തിരുപ്പതി തിരുമല വെങ്കടേശ്വര ക്ഷേത്രത്തില് തിക്കിലും തിരക്കിലും പെട്ട് ആറ് മരണം. നിരവധി പേര്ക്ക് പരിക്ക്.. വൈകുണ്ഠ ഏകാദശി കൂപ്പണ് വിതരണത്തിനിടെയാണ് അപകടമുണ്ടായത്. മരിച്ചവരില് മൂന്നു പേര് സ്ത്രീകളാണ്. സേലം സ്വദേശി മല്ലികയാണ് മരിച്ചവരില് ഒരാള്.
പരിക്കേറ്റവരെ ആശുപത്രിയിലേക്ക് മാറ്റി. ചിലരുടെ നില ഗുരുതരമാണ്. വിഷ്ണു നിവാസിലെ കൗണ്ടറിലാണ് അപകടമുണ്ടായത്. ടോക്കണ് വിതരണത്തിനായി ഒമ്പതിടത്തായി 94-ഓളം കൗണ്ടറുകള് ഒരുക്കിയിരുന്നു.
കൂപ്പണ് വിതരണ കൗണ്ടറിനു മുന്നിലേക്ക് ആളുകള് തള്ളിക്കയറിയതാണ് അപകടത്തിനു കാരണമായത്. തിരക്കില് പെട്ട് ആളുകള് സ്ഥലത്ത് നിന്ന് പരിഭ്രാന്തരായി ഓടുന്നതിന്റെ ദൃശ്യങ്ങളും പുറത്തുവന്നു. ദക്ഷിണേന്ത്യയിലെ എറ്റവും വലിയ തീര്ഥാടന കേന്ദ്രങ്ങളിലൊന്നായ തിരുപ്പതി ക്ഷേത്രത്തില് തിരക്കേറിയ സമയത്താണ് ഇത്തരമൊരു അപകടമുണ്ടായത്.
സംഭവത്തില് ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു നടുക്കം രേഖപ്പെടുത്തി. പരിക്കേറ്റവര്ക്ക് ആവശ്യമായ ചികിത്സ ഉറപ്പാക്കാന് മുഖ്യമന്ത്രി നിര്ദേശിച്ചു.