അനില് ആന്റണിയും പത്മജ വേണുഗോപാലും ബിജെപിയില് പ്രവേശിച്ചതില് തെറ്റില്ലെന്ന നിലപാടിലുറച്ച് പുതുപ്പള്ളി എംഎല്എ ചാണ്ടി ഉമ്മന്. കോണ്ഗ്രസില് പ്രവര്ത്തിക്കാന് സാധിക്കില്ലെന്ന് മനസിലാക്കിയാല് പോകുന്നതാണ് നല്ലതെന്നും ചാണ്ടി ഉമ്മന് പറഞ്ഞു. തീരുമാനമെടുക്കാനുള്ള വ്യക്തി സ്വാതന്ത്ര്യം ഇരുവര്ക്കുമുണ്ടെന്നും ചാണ്ടി കൂട്ടിച്ചേര്ത്തു.
കോണ്ഗ്രസില് നിന്ന് ഒരു വ്യക്തി പോയതുകൊണ്ട് പാര്ട്ടിയ്ക്ക് ഒരു നഷ്ടവുമില്ല. പ്രസ്ഥാനമാണ് വലുത്. കോണ്ഗ്രസിനെ സംബന്ധിച്ചും ഇരുവരും പാര്ട്ടി വിട്ടത് ശരിയായ തീരുമാനമാണ്. അവരെ സംബന്ധിച്ചും അതൊരു ശരിയായ തീരുമാനമാണ്. കാരണം പാര്ട്ടിയില് നില്ക്കാന് ഇരുവരും യോഗ്യരല്ലെന്നും ചാണ്ടി ഉമ്മന് പറഞ്ഞു.
രാഹുല് ഗാന്ധിയുടെ ഭാരത് ജോഡോ ന്യായ് യാത്രയുടെ ഭാഗമായി മുംബൈയില് എത്തിയതായിരുന്നു ചാണ്ടി ഉമ്മന്. പത്മജ കെ കരുണാകരന്റെ നിലവാരത്തിലേക്ക് ഉയര്ന്നില്ലെന്ന നിരാശയാണ് പാര്ട്ടിയില് നിന്നുയര്ന്ന വിമര്ശനങ്ങള്ക്ക് കാരണമെന്നും ചാണ്ടി ഉമ്മന് വ്യക്തമാക്കി. ലോക്സഭ തിരഞ്ഞെടുപ്പിലൂടെ കോണ്ഗ്രസ് വീണ്ടും അധികാരത്തിലെത്തുമെന്നും എംഎല്എ അഭിപ്രായപ്പെട്ടു.