രാഹുല് മാങ്കൂട്ടത്തില് നിയമസഭയില് വരുന്നതിന് തടസമില്ലെന്ന് സ്പീക്കര് എ എന് ഷംസീര്. പ്രതിപക്ഷത്തിന്റെ കത്ത് കിട്ടിയെന്നും രാഹുലിന് പ്രത്യേക ബ്ലോക്ക് നല്കുമെന്നും എ എന് ഷംസീര് വാർത്താസമ്മേളനത്തിൽ പറഞ്ഞു. പ്രതിപക്ഷത്തിന്റെ ബ്ലോക്കിന് പുറകിലായിരിക്കും രാഹുലിന്റെ ബ്ലോക്കെന്നും എ എന് ഷംസീര് അറിയിച്ചു.
സഭ നിര്ത്തിവച്ചുള്ള ചര്ച്ചകളിൽ രാഹുലിന് അവസരം നല്കില്ലെന്നും എ എന് ഷംസീര്. നേരത്തെ നിയമസഭയിൽ രാഹുൽ മാങ്കൂട്ടത്തിൽ പങ്കെടുക്കില്ലെന്ന് വാർത്തകൾ പുറത്ത് വന്നിരുന്നു. എന്നാൽ രാഹുല് മാങ്കൂട്ടത്തില് നിയമസഭയില് വരുന്നതിന് തടസമില്ലെന്ന് സ്പീക്കര് എ എന് ഷംസീര് വ്യക്തമാക്കി. നാളെയാണ് നിയമസഭാ സമ്മേളനത്തിന് തുടക്കമാകുന്നത്. അതേസമയം നിയമനിര്മ്മാണത്തിന് വേണ്ടി മാത്രമുള്ള പ്രത്യേക സമ്മേളനം നാല് ബില്ലുകള് ആണ് പരിഗണിക്കാന് തീരുമാനിച്ചിരിക്കുന്നതെന്നും സ്പീക്കര് പറഞ്ഞു.
നാളെ മുതല് 19 വരെയാണ് ആദ്യ സെഷന്. രണ്ടാം സെഷന് 29, 30 വരെ. മൂന്നാം സെഷന് ഒക്ടോബര് 6 മുതല് 10 വരെ എന്നിങ്ങനെയാണ്. ആദ്യ ദിവസം മുന് മുഖ്യമന്ത്രി വിഎസ് അച്യുതാനന്ദന്, മുന് സ്പീക്കര് പി പി തങ്കച്ചന്, വാഴൂര് സോമന് എന്നിവരുടെ നിര്യാണം സംബന്ധിച്ച റഫറന്സ് നടത്തി പിരിയും. ബാക്കി 11 ദിവസങ്ങളില് 9 ദിവസങ്ങള് ഔദ്യോഗിക കാര്യങ്ങള്ക്കും രണ്ട് ദിവസങ്ങള് അനൗദ്യോഗിക കാര്യങ്ങള്ക്കുമായി പരിഗണിക്കും.