പന്തളം കൊട്ടാരത്തില് സൂക്ഷിച്ചിരിക്കുന്ന തിരുവാഭരണത്തിലെ കാണിപ്പൊന്ന് നഷ്ടപ്പെട്ടു. വിഷുദിനത്തില് പന്തളം വലിയ കോയിക്കല് ധര്മ്മശാസ്താ ക്ഷേത്രത്തില് തിരുവാഭരണങ്ങള് ചാര്ത്തി ദര്ശനം നടത്തുന്നതിനിടെയാണ് മോഷണം. വിഷു കണികാണാന് നല്കിയ അശ്വാരൂഢനായ അയ്യപ്പന്റെ രൂപമുള്ള കാണിപ്പൊന്ന് കൈക്കലാക്കി കൊട്ടാരം കുടുംബാംഗമെന്ന് പറഞ്ഞു ദര്ശനത്തിനെത്തിയ ആള് മുങ്ങുകയായിരുന്നു.
ബുധനാഴ്ച രാവിലെയാണ് പന്തളം കൊട്ടാരത്തില് സൂക്ഷിച്ചിരുന്ന തിരുവാഭരണങ്ങള് വലിയകോയിക്കല് ധര്മ്മശാസ്താക്ഷേത്ര വിഗ്രഹത്തില് ചാര്ത്തി വിഷുക്കണി ദര്ശനം ഒരുക്കിയിരുന്നത്. പുലര്ച്ചെ നാലര മുതല് ദര്ശനസൗകര്യം ഉണ്ടായിരുന്നു. ആറുമണിയോടെ ദര്ശനത്തിനെത്തിയ ഭക്തരില് ഒരാള് കൊട്ടാരം കുടുംബാംഗമാണെന്ന് പറഞ്ഞ് കാണിപ്പൊന്ന് കൈക്കലാക്കുകയായിരുന്നു. ദര്ശനത്തിന് എത്തുന്ന പന്തളം കൊട്ടാരം കുടുംബാംഗങ്ങള്ക്ക് കണ്ണില് വച്ച് തൊഴാനായിട്ടാണ് കാണിപ്പൊന്ന് നല്കാറുള്ളത്. ശ്രീകോവിലിനുള്ളില് സൂക്ഷിക്കുന്ന കാണിപ്പൊന്ന് പൂജാരിയാണ് കണ്ണില് വച്ച് തൊഴുവാനായി കുടുംബാംഗങ്ങള്ക്ക് നല്കുന്നത്.
ക്ഷേത്രത്തിലെ സിസിടിവി ദൃശ്യങ്ങള് പരിശോധിച്ചു അന്വേഷണം ആരംഭിച്ചിട്ടുണ്ട്. പന്തളം സ്രാമ്പിക്കല് കൊട്ടാരത്തിലെ സുരക്ഷിത മുറിയില് സൂക്ഷിച്ചിരിക്കുന്ന തിരുവാഭരണങ്ങള് വലിയകോയിക്കല് ധര്മ്മശാസ്താക്ഷേത്ര വിഗ്രഹത്തില് ചാര്ത്തുന്നതിനായി കൊട്ടാരം, ദേവസ്വം ബോര്ഡിന് കൈമാറുകയാണ് പതിവ്. പുലര്ച്ചെ നാലര മുതല് 9 മണി വരെ ദര്ശനത്തിനുശേഷം ഇത് തിരികെ ഏല്പ്പിക്കുകയും ചെയ്യും. ഇതിനിടെയാണ് ഇപ്പോള് മോഷണം നടന്നിരിക്കുന്നത.