സംസ്ഥാനത്ത് മഴ ശക്തമാകുമെന്ന് കാലാവസ്ഥാ നിരീക്ഷണ കേന്ദ്രം. വടക്ക് പടിഞ്ഞാറന് ബംഗാള് ഉള്ക്കടലില് രൂപം കൊണ്ട ന്യൂനമര്ദ്ദം തീവ്ര ന്യൂനമര്ദ്ദമാകാന് സാധ്യതയുണ്ടെന്നും വരും ദിവസങ്ങളില് മഴ ശക്തമായേക്കുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു. ഇന്ന് എട്ട് ജില്ലകളില് യെല്ലോ അലര്ട്ട് പ്രഖ്യാപിച്ചു.
ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് എന്നീ ജില്ലകളിലാണ് യെല്ലോ അലര്ട്ട്. അതേസമയം എറണാകുളം ഇടമലയാര് ഡാം ഇന്ന് തുറക്കും. രാവിലെ 10 മണിക്കാണ് ഡാം തുറന്ന് വെള്ളം പുറത്തേക്കൊഴുക്കുക. ആദ്യം 50 ക്യുമെക്സ് ജലവും തുടര്ന്ന് 100 ക്യുമെക്സ് ജലവും തുറന്നുവിടും.
ഇടുക്കിക്കൊപ്പം ഇടമലയാര് ഡാമില് നിന്നുള്ള വെള്ളം കൂടിയെത്തുന്നതോടെ പെരിയാറില് ജലനിരപ്പ് ഉയരുമെങ്കിലും ആശങ്കപ്പെടേണ്ട സാഹചര്യം നിലവിലില്ലെന്ന് എറണാകുളം ജില്ലാ ഭരണകൂടം അറിയിച്ചു.
ആവശ്യമായ മുന്കരുതലുകള് സ്വീകരിച്ചിട്ടുണ്ട്. ജനങ്ങള് ജാഗ്രത പാലിക്കണമെന്നും ജില്ലാ കളക്ടര് ഡോ. രേണുരാജ് അറിയിച്ചു. എവിടെയെങ്കിലും അടിയന്തരസാഹചര്യം ഉണ്ടായാല് രക്ഷാപ്രവര്ത്തനത്തിന് വിന്യസിക്കാന് 21 അംഗ എന്.ഡി.ആര്.എഫ് സേനയെ തയ്യാറാക്കി നിര്ത്തിയിട്ടുണ്ട്. ജനപ്രതിനിധികളോടും വിവിധ വകുപ്പ് ഉദ്യോഗസ്ഥരോടും സജ്ജരായിരിക്കണമെന്നും ജില്ലാ ഭരണകൂടം നിര്ദ്ദേശിച്ചു.