കോഴിക്കോട് കൊയിലാണ്ടിയില് ആന ഇടഞ്ഞതിനെ തുടര്ന്ന് മൂന്ന് പേര് മരിച്ച സംഭവത്തില് ഗുരുവായൂര് ദേവസ്വം ബോര്ഡിനെതിരെ രൂക്ഷ വിമര്ശനവുമായി ഹൈക്കോടതി. ആനകളുടെ സുരക്ഷിതത്വം ഉറപ്പാക്കേണ്ടിയിരുന്നത് ഗുരുവായൂര് ദേവസ്വം ബോര്ഡാണെന്ന് കോടതി പറഞ്ഞു.
എന്ത് അടിസ്ഥാനത്തിലാണ് ആനകളെ നൂറ് കിലോമീറ്ററില് കൂടുതല് യാത്ര ചെയ്യിപ്പിച്ചതെന്നും കോടതി ചോദിച്ചു.
കൊയിലാണ്ടിയില് ആന ഇടഞ്ഞ സംഭവത്തില് ഹൈക്കോടതി സ്വമേധയാ കേസെടുക്കുകയായിരുന്നു. പടക്കം പൊട്ടിക്കുന്ന സ്ഥലത്ത് ആനയെ എന്തിന് നിര്ത്തിയെന്നും ഇത്രയും ദൂരം എന്തിനാണ് വിശ്രമമില്ലാതെ ആനയെ കൊണ്ടുപോയതെന്നും കോടതി ചോദിച്ചു. ഗുരുവായൂര് ദേവസ്വം ബോര്ഡിന്റെ രണ്ട് ആനകളാണ് കൊയിലാണ്ടിയില് ഉത്സവത്തിനിടെ ഇടഞ്ഞത്.
വിഷയത്തില് ഗുരുവായൂര് ദേവസ്വം ബോര്ഡിന്റെ ആന കൊട്ടകയുടെ ചുമതലയുള്ള ഉദ്യോഗസ്ഥനെ വിളിച്ചു വരുത്തിയാണ് കോടതി വിശദീകരണം തേടിയത്. ചട്ടപ്രകാരം നൂറ് കിലോമീറ്ററില് കൂടുതല് ആനകളെ യാത്ര ചെയ്യിപ്പിക്കാന് പാടില്ല. എന്നാല് 150 കിലോമീറ്ററോളം സഞ്ചരിച്ചാണ് ആനയെ കൊയിലാണ്ടിയിലെത്ത
ഏറെ നേരത്തെ വെടിക്കെട്ടിന് ശേഷമാണ് ആന വിരണ്ടോടുന്നത്. എന്തിനാണ് ആനകളുടെ ഇത്രയും അടുത്ത് വെച്ച് പടക്കം പൊട്ടിച്ചതെന്നും അതിനുള്ള അനുമതി നല്കിയതെന്നും കോടതി ചോദിച്ചു. അതേസമയം കേസ് കോടതി ബുധനാഴ്ച വീണ്ടും പരിഗണിക്കും.