ഗുരുവായൂരിൽ യു.ഡി.എഫ് സ്ഥാനാർത്ഥി കെ.എൻ.എ ഖാദർ ജയിക്കണമെന്ന് എം.പിയും തൃശൂരിലെ ബി.ജെ.പി സ്ഥാനാർത്ഥിയുമായ നടൻ സുരേഷ് ഗോപി. തലശ്ശേരിയിൽ എൽ.ഡി.എഫ് സ്ഥാനാർത്ഥി എ എൻ ഷംസീർ ഒരു കാരണവശാലും ജയിക്കരുതെന്നും ന്യൂസ് 18 ന് നൽകിയ അഭിമുഖത്തിൽ സുരേഷ് ഗോപി പറഞ്ഞു.
ഗുരുവായൂരിലും തലശ്ശേരിയിലും ബി.ജെ.പിക്ക് സ്ഥാനാർത്ഥികൾ ഇല്ലാത്ത പശ്ചാത്തലത്തിലാണ് സുരേഷ് ഗോപിയുടെ പ്രസ്താവന. വോട്ട് നോട്ടക്ക് നൽകണം അല്ലെങ്കിൽ സി.പി.എമ്മിനെ തോൽപ്പിക്കാൻ വോട്ട് ചെയ്യണമെന്നും സുരേഷ് ഗോപി പറഞ്ഞു.
കേരളത്തിൽ കോലീബി സഖ്യം ഉണ്ടായിരുന്നുവെന്നും അത് രഹസ്യമായിരുന്നില്ലെന്നും മുതിർന്ന ബിജെപി നേതാവും എൽ.എ.യുമായ ഒ.രാജഗോപാൽ ബി.ജെ.പി സംസ്ഥാന ജനറൽ സെക്രട്ടറി എം ടി രമേശ് എന്നിവർ നേരത്തെ വ്യക്തമാക്കിയിരുന്നു. എന്നാൽ നിലവിൽ ഇത്തരമൊരു ധാരണ ഇല്ലെന്നാണ് ബി.ജെ.പി നേതൃത്വം പറയുന്നത്. എന്നാൽ കോലീബി സഖ്യത്തെ പാടെ നിരാകരിക്കുന്ന നിലപാടാണ് കോൺഗ്രസിന്റേത്.