കോട്ടയം പാലായില്‍ ഫെയ്‌സ്ബുക്ക് ലൈവ് ഓണാക്കി ആത്മഹത്യയ്ക്ക് ശ്രമിച്ച യുവാവിനെ പൊലീസെത്തി രക്ഷിച്ചു. പാലാ കിഴതടിയൂര്‍ സ്വദേശിയായ മുപ്പതുകാരന്‍ ‘എന്റെ ആത്മഹത്യ ലൈവ്’ എന്ന പേരിലാണ് ദൃശ്യങ്ങള്‍ പ്രചരിപ്പിച്ചത്. ഇന്നലെ വൈകുന്നേരമാണ് സംഭവം.
വീട്ടില്‍ ആരുമില്ലാതിരുന്ന സമയത്ത് യുവാവ് ലൈവ് ഓണാക്കി കൈ ഞരമ്പ് മുറിക്കുകയായിരുന്നു. സംഭവം ശ്രദ്ധയില്‍പെട്ട ഒരാള്‍ പൊലീസില്‍ വിവരമറിയിച്ചു. തുടര്‍ന്ന് എസ്എച്ച്ഒ കെ.പി.തോംസണിന്റെ നേതൃത്വത്തിലുള്ള പൊലീസ് സംഘം യുവാവിന്‍രെ വീട്ടിലെത്തുകയും ഇയാളെ ആശുപത്രിയില്‍ പ്രവേശിപ്പിക്കുകയുമായിരുന്നു.
പൊലീസ് സ്ഥലത്തെത്തുമ്പോള്‍ വീട് അകത്തു നിന്നു പൂട്ടിയ നിലയിലായിരുന്നു. ഫയര്‍ഫോഴ്‌സിനെ വിവരം അറിയിച്ചുവെങ്കിലും അവര്‍ എത്തുന്നതിന് മുമ്പു തന്നെ പൊലീസ് യുവാവിനെ അനുനയിപ്പിച്ച് വീടിന്റെ വാതില്‍ തുറപ്പിച്ചു. പിന്നീട് ആംബുലന്‍സില്‍ ആശുപത്രിയിലേക്കു മാറ്റി. പരിക്ക് ഗുരുതരമല്ലെന്ന് പൊലീസ് അറിയിച്ചു.