തൃശൂര് സ്കൂള് ഓഫ് ഡ്രാമയില് വിദ്യാര്ത്ഥിനിയെ ലൈംഗികമായി പീഡിപ്പിച്ചുവെന്ന പരാതിയില് അധ്യാപകന് എസ്. സുനില്കുമാര് അറസ്റ്റില്. ഇന്ന് പുലര്ച്ചെ കണ്ണൂരില് നിന്ന് തൃശൂര് വെസ്റ്റ് പൊലീസാണ് ഇയാളെ കസ്റ്റഡിയില് എടുത്തത്. സുഹൃത്തിന്റെ വീട്ടില് ഒളിവില് കഴിയുകയായിരുന്നു സുനില്.
സ്കൂള് ഓഫ് ഡ്രാമയില് വിദ്യാര്ത്ഥിനിയെ ലൈംഗികമായി പീഡിപ്പിച്ചുവെന്ന പരാതിയില് സുനില്കുമാറിനെ കഴിഞ്ഞ ദിവസം സസ്പെന്ഡ് ചെയ്തിരുന്നു. അധ്യാപകന് കാമ്പസില് കടക്കുന്നതും വിലക്കിയിട്ടുണ്ട്. സ്കൂള് ഓഫ് ഡ്രാമ ഡീന് എസ്. സുനില്കുമാറിനെതിരെ വെസ്റ്റ് പൊലീസ് ബലാല്സംഗ കുറ്റം ചുമത്തി എഫ്.ഐ.ആര് രജിസ്റ്റര് ചെയ്തെങ്കിലും അറസ്റ്റ് ഉള്പ്പടെയുള്ള നടപടികള് ഉണ്ടാകുന്നില്ലെന്ന് വിദ്യാര്ത്ഥികള് ആരോപിച്ചിരുന്നു
ഓറിയന്റേഷന് ക്ലാസിനിടെ താത്കാലിക അധ്യാപകന് രാജ വാര്യര് പരാതിക്കാരിയായ കുട്ടിയെ ദേഹോപദ്രവം ഏല്പ്പിച്ചിരുന്നു. ഇതിനെ തുടര്ന്ന് സ്കൂള് ഓഫ് ഡ്രാമ ഗ്രീവന്സ് സെല്ലില് പെണ്കുട്ടി പരാതി നല്കിയിരുന്നു.
ഇതിന് പിന്നാലെ പെണ്കുട്ടിക്ക് ധാര്മ്മിക പിന്തുണയുമായി എത്തിയ സുനില്കുമാര് സൗഹൃദം മുതലെടുത്ത് പീഡനത്തിന് ഇരയാക്കുകയായിരുന്നുവെന്ന് പരാതിയില് പറയുന്നു. പെണ്കുട്ടി ആത്മഹത്യയ്ക്ക് ശ്രമിച്ചതോടെയാണ് പീഡന വിവരം പുറത്തുവന്നത്.
അതേസമയം, ആരോപണവിധേയനായ എസ് സുനില്കുമാറിനെ അറസ്റ്റ് ചെയ്യുകയും സ്ഥാപനത്തില് നിന്ന് പുറത്താക്കുകയും ചെയ്യും വരെ പഠിപ്പുമുടക്കുമെന്നും വിദ്യാര്ത്ഥികള് പറഞ്ഞിരുന്നു. പരാതി നല്കാന് എത്തിയപ്പോള് വിദ്യാര്ത്ഥിനിയോട് സ്റ്റേഷന് എസ്.ഐ മോശമായി പെരുമാറിയതായും വിദ്യാര്ത്ഥികള് ആരോപിച്ചു.