മലമ്പുഴ ഡാമിന്റെ വൃഷ്ടിപ്രദേശങ്ങളില് മഴ തുടരുന്ന സാഹചര്യത്തില് ഇന്ന് രാവിലെ ഒമ്പതിന് സ്പില്വേ ഷട്ടറുകള് തുറക്കുമെന്ന് എക്സിക്യൂട്ടീവ് എന്ജിനീയര് അറിയിച്ചു. നാല് ഷട്ടറുകളാണ് തുറക്കുക. മലമ്പുഴ ഡാമിന്റെ താഴ് ഭാഗത്തുള്ള മുക്കൈപുഴ, കല്പ്പാത്തി പുഴ, ഭാരതപ്പുഴ എന്നിവയുടെ തീരത്ത് താമസിക്കുന്നവരും മീന്പിടുത്തക്കാരും പുഴയില് ഇറങ്ങുന്നവരും ജാഗ്രത പാലിക്കണമെന്ന് എക്സിക്യൂട്ടീവ് എന്ജിനീയര് അറിയിച്ചു.
കെഎസ്ഇബിയുടെ ഇടമലയാര്, കക്കി, ബാണാസുരസാഗര്, ഷോളയാര്, പൊന്മുടി, കുണ്ടള, ലോവര് പെരിയാര്, കല്ലാര്കുട്ടി, മൂഴിയാര് ഡാമുകളില് റെഡ് അലര്ട്ട് പ്രഖ്യാപിച്ചു. മാട്ടുപ്പെട്ടി, ആനയിറങ്കല്, പെരിങ്ങല്ക്കുത്ത് എന്നിവിടങ്ങളില് ഓറഞ്ച് അലര്ട്ടും ഇടുക്കിയിലും കുറ്റ്യാടിയിലും ബ്ലൂ അലര്ട്ടുമാണ്.
സംസ്ഥാനത്ത് ഇന്നും ശക്തമായ മഴയ്ക്ക് സാധ്യത. എല്ലാ ജില്ലകളിലും യെല്ലോ അലര്ട്ട് പ്രഖ്യാപിച്ചിട്ടുണ്ട്. ഉച്ചയ്ക്ക് ശേഷം മഴ ശക്തമാകാനും പുലര്ച്ചെ വരെ മഴ തുടരാനും സാധ്യത ഉണ്ട്. തിരുവനന്തപുരം മുതല് എറണാകുളം വരെയുള്ള കിഴക്കന് മേഖലകളിലാണ് കൂടുതല് മഴ സാധ്യത. ശനിയാഴ്ച വരെ കേരളത്തില് ശക്തമായ മഴയ്ക്കു സാധ്യതയുണ്ടെന്നാണ് കാലാവസ്ഥാ പ്രവചനം.
തെക്കേ ഇന്ത്യക്ക് മുകളിലായി നിലനില്ക്കുന്ന അന്തരീക്ഷ ചുഴിയും അതിന് കാരണമായ താഴ്ന്ന മര്ദ്ദനിലയുമാണ് ഒറ്റപ്പെട്ട കനത്ത മഴ ലഭിക്കുന്നതിന് കാരണം. ഇത് വടക്കോട്ട് നീങ്ങുന്നതിന് അനുസരിച്ച് വടക്കന് കേരളത്തില് മഴ ശക്തമായേക്കും.
11.5 സെന്റീമീറ്റര് വരെ മഴ പെയ്തേക്കുമെന്നാണ് കേന്ദ്ര കാലാവസ്ഥാ വകുപ്പ് അറിയിക്കുന്നത്. കേരള ലക്ഷദ്വീപ് തീരങ്ങളില് വെള്ളിയാഴ്ച വരെ മത്സ്യബന്ധനത്തിനു വിലക്കേര്പ്പെടുത്തി. 55 കി.മീ. വരെ വേഗത്തില് കാറ്റിനും സാധ്യതയുണ്ട്.