ബിജെപി നേതാവ് ശോഭ സുരേന്ദ്രന്‍ ഉന്നയിച്ച ആരോപണങ്ങളില്‍ മാനനഷ്ടക്കേസുമായി മുന്നോട്ട് പോകുമെന്ന് ഗോകുലം ഗ്രൂപ്പ് സ്ഥാപനങ്ങളുടെ ഉടമ ഗോകുലം ഗോപാലന്‍. പോകുന്നവര്‍ക്കും വരുന്നവര്‍ക്കും കൊട്ടാന്‍ വഴിക്കുള്ള ചെണ്ടയല്ല താനെന്നും ഗോകുലം ഗോപാലന്‍ പറഞ്ഞു. ശോഭ സുരേന്ദ്രനെതിരെ ഇന്ന് കേസ് കൊടുത്തെന്നും ഗോപാലന്‍ കൂട്ടിച്ചേര്‍ത്തു.
ശശിധരന്‍ കര്‍ത്തയെ തനിക്ക് അറിയില്ല. അറിയാത്ത ആളിനുവേണ്ടി എങ്ങനെ ഇടപെടാന്‍ സാധിക്കുമെന്നും ഗോപാലന്‍ ചോദിച്ചു. തനിക്ക് ശോഭ സുരേന്ദ്രനുമായി പ്രശ്‌നങ്ങളില്ല. ശോഭ തനിക്ക് പ്രശ്‌നങ്ങളുള്ള ആളുകളെ പ്രീതിപ്പെടുത്താന്‍ വേണ്ടി പറഞ്ഞതാവും. അവര്‍ക്ക് അതിലൂടെ എന്തെങ്കിലും ലഭിക്കുന്നുണ്ടെങ്കില്‍ ലഭിക്കട്ടെയെന്നും ഗോപാലന്‍ അഭിപ്രായപ്പെട്ടു.
തൃശൂരില്‍ ആളെ അയച്ച് വെള്ളാപ്പള്ളി നടേശനെ പുകഴ്ത്തി പറയരുതെന്നും എതിരായി പറയണമെന്നും താന്‍ പറഞ്ഞതായാണ് ശോഭ പറഞ്ഞത്. തനിക്ക് ഇത് ശോഭയോട് നേരിട്ട് പറയാവുന്നതേയുള്ളൂ. തിരഞ്ഞെടുപ്പിനെ വ്യക്തിപരമായ കാര്യങ്ങളുമായി ബന്ധപ്പെടുത്താന്‍ ആഗ്രഹിക്കുന്നില്ലെന്നും ഗോകുലം ഗോപാലന്‍ വ്യക്തമാക്കി.
