ഹണി റോസിനെതിരായ ലൈംഗികാധിക്ഷേപ കേസിൽ പ്രമുഖ വ്യവസായി ബോബി ചെമ്മണ്ണൂരിന് ജാമ്യം അനുവദിച്ച് ഹൈകോടതി. എന്നാൽ പ്രഥമദൃഷ്ട്യാ കുറ്റം നിലനിൽക്കുമെന്ന് ജാമ്യം അനുവദിച്ചു കൊണ്ടുള്ള ഉത്തരവിൽ കോടതി വ്യക്തമാക്കി. അതേസമയം സമൂഹത്തിന് പാഠമാകുന്ന തീരുമാനം വേണമെന്ന് സർക്കാർ കോടതിയെ അറിയിച്ചിരുന്നു.
ബോബി ചെമ്മണ്ണൂർ അധിക്ഷേപം പതിവാക്കിയ ആളാണ് എന്നും സർക്കാർ കോടതിയെ അറിയിച്ചു. നടി ഹണി റോസിനെതിരെ ലൈംഗികാധിക്ഷേപ പരാമർശം നടത്തിയതിന് റിമാൻഡിലായി ജയിലിൽ കഴിയുകയായിരുന്നു ബോബി ചെമ്മണ്ണൂർ. ഒരേ കുറ്റകൃത്യം തുടർച്ചയായി ആവർത്തിക്കുന്നയാളാണ് പ്രതിയെന്ന് സർക്കാർ ഹൈക്കോടതിയിൽ അറിയിച്ചു.
കൃത്യമായ ഉപാധികളോടെയാണ് ബോബി ചെമ്മണ്ണൂരിന് ഹൈക്കോടതി ജാമ്യം നല്കിയത്. ബോബി ചെമ്മണ്ണൂര് അന്പതിനായിരം രൂപയുടെ രണ്ട് ആള്ജാമ്യം നല്കണം, ആവശ്യപ്പെടുമ്പോള് അന്വേഷണ ഉദ്യോഗസ്ഥന് മുന്നില് ഹാജരാകണം, സമാന സ്വഭാവമുള്ള കുറ്റകൃത്യത്തില് ഏര്പ്പെടരുത്, സാക്ഷികളെ സ്വാധീനിക്കരുത്. എന്നിവയാണ് ബോബി ചെമ്മണ്ണൂരിന് ജാമ്യം അനുവദിച്ചു കൊണ്ട് കോടതി മുന്നോട്ട് വെച്ച വ്യവസ്ഥകൾ. ജാമ്യ വ്യവസ്ഥകള് ലംഘിച്ചാല് ജാമ്യം റദ്ദാക്കാന് പൊലീസിന് കോടതിയെ സമീപിക്കാം തുടങ്ങിയ ഉപാധികളും ഉൾപ്പെടുത്തിയാണ് ബോബി ചെമ്മണ്ണൂരിന് ഹൈക്കോടതി ജാമ്യം അനുവദിച്ചിരിക്കുന്നത്.