നിലമ്പൂര് ഉപതിരഞ്ഞെടുപ്പില് യുഡിഎഫിന് പിന്നാലെ സ്ഥാനാര്ത്ഥിയെ പ്രഖ്യാപിച്ച് എസ്ഡിപിഐ. എസ്ഡിപിഐ മലപ്പുറം ഉപാധ്യക്ഷന് അഡ്വ സാദിഖ് നടുത്തൊടിയാണ് ഉപതിരഞ്ഞെടുപ്പ് സ്ഥാനാര്ത്ഥി. എസ്ഡിപിഐ സംസ്ഥാന പ്രസിഡന്റ് സിപിഎ ലത്തീഫ് വാര്ത്താസമ്മേളനത്തിലൂടെ സ്ഥാനാര്ത്ഥിയെ പ്രഖ്യാപിക്കുകയായിരുന്നു.
തങ്ങള് ജയിക്കാന് വേണ്ടിയാണ് മത്സരിക്കുന്നതെന്നും എല്ലാ ബൂത്തിലും പ്രവര്ത്തകരുണ്ടെന്നും സിപിഎ ലത്തീഫ് പറഞ്ഞു. കേരളത്തിലെ മൂന്ന് മുന്നണികളോടും പ്രത്യേക മമതയോ വിദ്വേഷവുമില്ല. പിവി അന്വര് ബന്ധപ്പെട്ടിട്ടില്ല. ഒരു മുന്നണിയുമായും തിരഞ്ഞെടുപ്പ് ചര്ച്ചകള് നടന്നിട്ടില്ല. മത്സരിക്കുന്നത് ആരെയും സഹായിക്കാനല്ലെന്നും നാളെ മുതല് സ്ഥാനാര്ത്ഥിക്കുവേണ്ടി പ്രചാരണം ആരംഭിക്കുമെന്നും സിപിഎ ലത്തീഫ് കൂട്ടിച്ചേര്ത്തു.
മണ്ഡലത്തില് ബൂത്ത് തലത്തില് അടിത്തറയുണ്ടെന്നും മത്സരിക്കുന്നത് ജയിക്കാന് മാത്രമാണെന്നും എസ്ഡിപിഐ സ്ഥാനാര്ത്ഥി അഡ്വ സാദിഖ് നടുത്തൊടി പറഞ്ഞു. മുന്പും പല മണ്ഡലങ്ങളിലും എസ്ഡിപിഐ മത്സരിച്ചിട്ടുണ്ട്. പാലക്കാട് സ്ഥാനാര്ത്ഥിയെ നിര്ത്തിയിരുന്നില്ല. പാലക്കാട് വിജയിക്കേണ്ടത് രാഹുല് മാങ്കൂട്ടത്തില് ആണെന്ന് തീരുമാനമുണ്ടായിരുന്നു. അതുകൊണ്ടാണ് പിന്തുണച്ചത്. എസ്ഡിപിഐ നിലമ്പൂരില് കാലങ്ങളായി രാഷ്ട്രീയ പ്രവര്ത്തനം നടത്തുന്നുണ്ട്. വലിയ ഭൂരിപക്ഷത്തില് വിജയം നേടുമെന്നും സാദിഖ് നടുത്തൊടി വ്യക്തമാക്കി.