ശബരിമല സ്വര്ണക്കൊള്ളയില് ജയിലിലുണ്ടായിരുന്ന ദേവസ്വം മുന് കമ്മീഷ്ണറും പ്രസിഡന്റുമായ എന് വാസുവും പുറത്തേക്ക്. കൊല്ലം വിജിലന്സ് കോടതി എന് വാസുവിന് സ്വഭാവിക ജാമ്യം അനുവദിച്ചു. ഉപാധികളോടെയാണ് ജാമ്യം അനുവദിച്ചത്. എസ്ഐടി കുറ്റപത്രം സമര്പ്പിക്കാത്തത് പഴുതാക്കിയാണ് ഇപ്പോള് കേസിലെ പ്രതിയായ എന് വാസുവും ജാമ്യം നേടിയത്. ഇതുവരെ നാല് പ്രതികളാണ് ഇത്തരത്തില് സ്വാഭാവിക ജാമ്യം നേടി പുറത്തിറങ്ങിയത്. എന് വാസു സമര്പ്പിച്ച സ്വാഭാവിക ജാമ്യ ഹര്ജിയില് വാദം പൂര്ത്തിയായശേഷമാണ് ഇന്ന് ജാമ്യം അനുവദിച്ചുകൊണ്ട് വിധി പറഞ്ഞത്. കട്ടിളപ്പാളി കേസിലെ മൂന്നാം പ്രതിയായ എൻ. വാസു നവംബർ 11നാണ് അറസ്റ്റിലായത്.
എസ്ഐടി കുറ്റപത്രം സമര്പ്പിക്കാത്തത് കൂടി ചൂണ്ടിക്കാട്ടിയാണ് വാസു ജാമ്യ നീക്കം നടത്തിയത്. വിവേചനം കാണിക്കാന് പറ്റില്ലെന്നും ജാമ്യ ഹര്ജിയില് ഇന്ന് വിധി പറയുമെന്നുമാണ് ഇന്നലെ ഹര്ജി പരിഗണിച്ച കോടതി വ്യക്തമാക്കിയത്. ഇതുവരെ നാലു പ്രതികള് ജാമ്യം നേടി പുറത്തിറങ്ങി. ഒന്നാം പ്രതി ഉണ്ണികൃഷ്ണന് പോറ്റി ഉള്പ്പടെ പ്രതികള്ക്ക് സ്വാഭാവിക ജാമ്യമാണ് ലഭിച്ചത്. വാസുവിന്റെ റിമാന്ഡ് കാലാവധി 90 ദിവസം പിന്നിട്ടതോടെയാണ് സ്വഭാവിക ജാമ്യം ലഭിച്ചത്. എസ്ഐടി കുറ്റപത്രം സമര്പ്പിക്കാത്തത് കൂടി ചൂണ്ടിക്കാട്ടിയാണ് ജാമ്യ ഹര്ജി നല്കിയിരുന്നത്.
ഇതോടെ ശബരിമല സ്വര്ണക്കൊള്ള കേസില് ഇതുവരെ അഞ്ചു പ്രതികള് ജാമ്യം നേടി പുറത്തിറങ്ങി. കുറ്റപത്രം നല്കുന്നത് ഇനിയും വൈകിയാല് കേസിലെ പ്രതിയായ എ പത്മകുമാറും സ്വഭാവിക ജാമ്യം തേടി പുറത്തിറങ്ങാനുള്ള സാഹചര്യമൊരുങ്ങും. തന്ത്രി കണ്ഠര് രാജീവരുടെ രണ്ട് കേസുകളിലെയും ജാമ്യ ഹര്ജികളില് ഇന്നലെ വാദം പൂര്ത്തിയായിരുന്നു. ഈ മാസം 18 നാണ് വിധി പറയുന്നത്.
കേസിലെ പ്രതികളായ പങ്കജ് ഭണ്ഡാരി, ഗോവര്ദ്ധന്, കെ എസ് ബൈജു എന്നിവരുടെ റിമാന്ഡ് 14 ദിവസത്തേയ്ക്ക് കൂടെ നീട്ടി.