കൊട്ടാരക്കര-ദിണ്ടിഗല് ദേശീയപാതയില് കാറില് അപകടരമായ രീതിയില് യാത്ര ചെയ്ത യുവാവിനെതിരെ നടപടിയുമായി മോട്ടോര് വാഹന വകുപ്പ്. ആലപ്പുഴ രജിസ്ട്രേഷനിലുള്ള കാറിലായിരുന്നു യുവാവിന്റെ അഭ്യാസ പ്രകടനം. കൊട്ടാരക്കര-ദിണ്ടിഗല് ദേശീയപാതയില് കാറിന്റെ സണ്റൂഫിലിരുന്ന് അപകടകരമായ രീതിയില് യാത്ര ചെയ്ത യുവാവിനെതിരെയാണ് നടപടി.
തിങ്കളാഴ്ചയാണ് കേസിന് ആസ്പദമായ സംഭവം നടന്നത്. ദേശീയപാതയില് കുമളിയില് നിന്നും ലോവര്ക്യാമ്പിലേക്കുള്ള റോഡിലായിരുന്നു ആലപ്പുഴ രജിസ്ട്രേഷനിലുള്ള കാറിന്റെ സണ്റൂഫിലിരുന്ന് യുവാവ് യാത്ര നടത്തിയത്. സംഭവത്തിന്റെ വീഡിയോ സാമൂഹ്യ മാധ്യമങ്ങളിലൂടെ വ്യാപകമായി പ്രചരിച്ചിരുന്നു.
ഇതിന് പിന്നാലെയാണ് നടപടിയുമായി മോട്ടോര് വാഹന വകുപ്പ് രംഗത്തെത്തിയത്. എന്നാല് സംഭവം നടന്നത് തമിഴ്നാട്ടിലായതിനാല് തേനി ആര്ടിഒയ്ക്ക് കത്ത് നല്കുമെന്ന് കുമളി മോട്ടോര് വാഹനവകുപ്പ് ഉദ്യോഗസ്ഥര് അറിയിച്ചു. യുവാവ് അഭ്യാസ പ്രകടനം നടത്തിയ വാഹനത്തിന് പിന്നില് സഞ്ചരിച്ച വാഹനത്തിലിരുന്നവരാണ് ദൃശ്യങ്ങള് പകര്ത്തിയത്.