നടി ഹണി റോസ് നല്കിയ പരാതിയില് രാഹുല് ഈശ്വറിന് തിരിച്ചടി. നടി ഹണി റോസ് നല്കിയ പരാതിയില് അറസ്റ്റ് തടയണമെന്ന രാഹുല് ഈശ്വറിന്റെ വാദം ഹൈക്കോടതി തള്ളുകയായിരുന്നു. മുന്കൂര് ജാമ്യാപേക്ഷയില് ഹൈക്കോടതി പൊലീസിന്റെ നിലപാട് തേടി. ഹര്ജി ഫയലില് സ്വീകരിച്ച ഹൈക്കോടതി ഈ മാസം 27ന് പരിഗണിക്കുന്നതിനായി മാറ്റിവെച്ചു.
നടിയുടെ പരാതിയില് പൊലീസ് അറസ്റ്റ് ചെയ്യാനുള്ള സാധ്യത കണക്കിലെടുത്താണ് രാഹുല് മുന്കൂര് ജാമ്യാപേക്ഷയുമായി കോടതിയെ സമീപിച്ചത്. സാമൂഹിക മാധ്യമങ്ങളിലൂടെ രാഹുല് ഈശ്വര് തനിക്കെതിരെ സംഘടിത ആക്രമണം നടത്തുന്നുവെന്നായിരുന്നു ഹണി റോസിന്റെ പരാതി. എറണാകുളം സെന്ട്രല് പൊലീസിലാണ് ഹണി റോസ് പരാതി നല്കിയത്.
നടിയുടെ വസ്ത്രധാരണത്തില് ഉള്പ്പെടെ വിമര്ശനം ഉന്നയിച്ച് രാഹുല് ഈശ്വര് രംഗത്തെത്തിയിരുന്നു. പൊതുബോധം തനിക്കെതിരാക്കാനാണ് ശ്രമമെന്നും വലിയ ഗൂഢാലോചന ഇതിന്റെ ഭാഗമായുണ്ടെന്നും ഇക്കാര്യങ്ങളെല്ലാം പരിശോധിക്കണമെന്നുമാണ് ഹണി റോസിന്റെ ആവശ്യം.