സീറ്റ് വിവാദങ്ങള്ക്കിടെ വൈകാരിക ഫെയ്സ്ബുക്ക് കുറിപ്പുമായി കോണ്ഗ്രസ് നേതാവ് കെ സുധാകരന് എംപി. കണ്ണൂര് എന്നത് തന്റെ ഹൃദയരക്തമാണെന്നും കണ്ണൂരിലെ കോണ്ഗ്രസ്സ് എന്നും തന്റെ മേല്വിലാസമാണെന്നും കെ സുധാകരന് കുറിക്കുന്നു. കണ്ണൂരുമായുള്ള തന്റെ ആത്മബന്ധം വിശദീകരിച്ചുകൊണ്ടാണ് സുധാകരന്റെ ഫെയ്സ്ബുക്ക് കുറിപ്പ്. സ്ഥാനാര്ഥി ചര്ച്ചകളില് അതൃപ്തി പ്രകടമാക്കി ഡല്ഹിയില്നിന്ന് നാട്ടിലേക്ക് മടങ്ങിയതിനു പിന്നാലെയാണ് കെ സുധാകരന് ഫെയ്സ്ബുക്കില് പോസ്റ്റ് പങ്കുവെച്ചത്.
തന്റെ പ്രസ്ഥാനത്തെ സംരക്ഷിക്കാനുള്ള പ്രവര്ത്തനത്തിനിടയില് തന്റെ വീടിനെയും വീട്ടുകാരെയും കുറിച്ച് താന് ഈ നിമിഷംവരെ ചിന്തിച്ചിട്ടില്ലെന്ന് കുറിപ്പില് കെ സുധാകരന് പറയുന്നു. തന്റെ കൈപിടിച്ച് വളര്ന്നവരും പ്രവര്ത്തിച്ചവരുമാണ് ഇന്ന് കണ്ണൂരിലുള്ള ഓരോ നേതാക്കളെന്നും ഞാന് അറിയാത്ത കണ്ണൂരില്ല, എന്നെ അറിയാത്ത കണ്ണൂരുമില്ലെന്നും അണികളുടെ കെഎസ് കുറിക്കുന്നു. കടന്നുവന്ന കനല് വഴികള് ഒരുപക്ഷെ മറ്റുള്ളവര്ക്ക് മറക്കാനാകുമായിരിക്കുമെന്നും പക്ഷെ എനിക്കതൊന്നും മരണത്തിലും മറക്കാനാവാത്ത പച്ചയായ യാഥാര്ഥ്യങ്ങളാണെന്നും കോണ്ഗ്രസിന് വേണ്ടി ക്ണ്ണൂരിലെ തന്റെ പ്രവര്ത്തനങ്ങള് ചെറുതല്ലെന്ന് ഓര്മ്മിപ്പിച്ച് കെ സുധാകരന് കുറിയ്ക്കും.
കണ്ണൂര് ഹൃദയരക്തം ഇറ്റിവീണ നമ്മുടെ മണ്ണാണ്. പൊരുതി വിജയിച്ച കോണ്ഗ്രസ്സുകാരുടെ ത്യാഗഭൂമിയാണ്. ആ മണ്ണിനുവേണ്ടി കോണ്ഗ്രസിന്റെ ത്രിവര്ണ പതാക നെഞ്ചിലേറ്റി കെ. സുധാകരന് എന്നും മുന്നില്ത്തന്നെ ഉണ്ടാകും. എന്റെ ചോരയും വിയര്പ്പും വീണ മണ്ണില്, എന്റെ സഹപ്രവര്ത്തകരുടെ ചോരവീണ മണ്ണില്, ഉറ്റവരെ നഷ്ടപ്പെട്ട പ്രിയപ്പെട്ടവരുടെ ചങ്കുപിളര്ന്ന വിലാപങ്ങളുയര്ന്ന മണ്ണില് കെ.സുധാകരന് തലയുയര്ത്തി നില്ക്കും.
കണ്ണൂര് തന്റെ ഹൃദയരക്തമാണെന്നും കണ്ണൂരിലെ കോണ്ഗ്രസ്സ് എന്നും തന്റെ മേല്വിലാസമാണെന്നും സുധാകരന് കുറിപ്പില് പറയുന്നു. സിപിഎമ്മുമായുള്ള ഏറ്റുമുട്ടലും പ്രസ്ഥാനത്തിന്റെ വളര്ച്ചയും സുധാകരന് ഫെയ്സ്ബുക്ക് കുറിപ്പില് ഓര്മ്മിപ്പിക്കുന്നുണ്ട്. ഇവയൊക്കെ മരണത്തിലും മറക്കാനാകാത്ത പച്ചയായ യാഥാര്ത്ഥ്യങ്ങളാണെന്നും മറ്റുള്ളവര്ക്ക് മറക്കാനാകുമായിരിക്കുമെന്നും സുധാകരന് കുറിപ്പില് പുറയുന്നു.
ഫേയ്സ്ബുക്ക് കുറിപ്പ് പൂര്ണരൂപം:
കണ്ണൂര് എന്നത് എന്റെ ഹൃദയരക്തമാണ്. കണ്ണൂരിലെ കോണ്ഗ്രസ്സ് എന്നും എന്റെ മേല്വിലാസവുമാണ്. കല്ലില് നിന്നും, കത്തിയില് നിന്നും, അരിവാളില് നിന്നും, ബോംബില് നിന്നും തള്ളക്കോഴി കുഞ്ഞുങ്ങളെ ചിറകിനടിയില് സംരക്ഷിക്കുന്നതുപോലെ ഞാന് മുന്നില്നിന്ന് പൊരുതി സംരക്ഷിച്ച എന്റെ സഹോദരരെ കമ്മ്യൂണിസ്റ്റു കാപാലികര് ഉപദ്രവിക്കുന്നത് കണ്ടുനില്ക്കാന് എനിക്കൊരിക്കലും സാധിക്കില്ല.
ഞാന് ഉണരുമ്പോള് എന്റെ കണ്ണില് തെളിയുന്നത് ജീവനും രക്തവും നല്കി നമ്മളൊരുമിച്ചു കെട്ടിപ്പടുത്ത നമ്മുടെ പാര്ട്ടിയുടെ സ്വപ്നങ്ങളാണ്. ഞാന് കണ്ണടക്കുമ്പോള് ഉള്ക്കണ്ണില് തെളിഞ്ഞുവരുന്നത് കമ്മ്യൂണിസ്റ്റുകാര് നരനായാട്ട് നടത്തി കൊലപ്പെടുത്തിയ എന്റെ സഹപ്രവര്ത്തകരുടെ ചേതനയറ്റ മുഖവുമാണ്.
കണ്ണൂര് ഹൃദയരക്തം ഇറ്റിവീണ നമ്മുടെ മണ്ണാണ്. പൊരുതി വിജയിച്ച കോണ്ഗ്രസ്സുകാരുടെ ത്യാഗഭൂമിയാണ്. ആ മണ്ണിനുവേണ്ടി കോണ്ഗ്രസിന്റെ ത്രിവര്ണ പതാക നെഞ്ചിലേറ്റി കെ. സുധാകരന് എന്നും മുന്നില്ത്തന്നെ ഉണ്ടാകും. എന്റെ ചോരയും വിയര്പ്പും വീണ മണ്ണില്, എന്റെ സഹപ്രവര്ത്തകരുടെ ചോരവീണ മണ്ണില്, ഉറ്റവരെ നഷ്ടപ്പെട്ട പ്രിയപ്പെട്ടവരുടെ ചങ്കുപിളര്ന്ന വിലാപങ്ങളുയര്ന്ന മണ്ണില് കെ.സുധാകരന് തലയുയര്ത്തി നില്ക്കും.
എന്റെ പ്രസ്ഥാനത്തെ സംരക്ഷിക്കാനുള്ള പ്രവര്ത്തനത്തിനിടയില് എന്റെ വീടിനെയും വീട്ടുകാരെയും കുറിച്ച് ഞാന് ഈ നിമിഷംവരെ ചിന്തിച്ചിട്ടില്ല. എന്റെ കൈപിടിച്ച് വളര്ന്നവരും പ്രവര്ത്തിച്ചവരുമാണ് ഇന്ന് കണ്ണൂരിലുള്ള ഓരോ നേതാക്കളും. ഞാന് അറിയാത്ത കണ്ണൂരില്ല, എന്നെ അറിയാത്ത കണ്ണൂരുമില്ല. കടന്നുവന്ന കനല് വഴികള് ഒരുപക്ഷെ മറ്റുള്ളവര്ക്ക് മറക്കാനാകുമായിരിക്കും, പക്ഷെ എനിക്കതൊന്നും മരണത്തിലും മറക്കാനാവാത്ത പച്ചയായ യാഥാര്ഥ്യങ്ങളാണ്.