എറണാകുളം ഗ്ലോബല് പബ്ലിക് സ്കൂളിലെ വിദ്യാര്ത്ഥി മിഹിര് അഹമ്മദ് ജീവനൊടുക്കിയ സംഭവത്തില് അന്വേഷണം ആരംഭിച്ച് വിദ്യാഭ്യാസ വകുപ്പ്. ജില്ലാ വിദ്യാഭ്യാസ ഓഫീസര് തിരുവാണിയൂര് ഗ്ലോബല് പബ്ലിക് സ്കൂളില് പ്രാഥമിക പരിശോധന നടത്തി. കഴിഞ്ഞ ദിവസം വിദ്യാഭ്യാസ മന്ത്രി വി ശിവന്കുട്ടി അന്വേഷണത്തിന് ഉത്തരവിട്ടിരുന്നു.
ഇതിന് പിന്നാലെയാണ് എറണാകുളം ജില്ലാ വിദ്യാഭ്യാസ ഓഫീസര് ഗ്ലോബല് പബ്ലിക് സ്കൂളില് നേരിട്ടെത്തി പരിശോധന നടത്തിയത്. കേസില് വിശദ മൊഴി നല്കാന് കുട്ടിയുടെ മാതാവ് നാളെ അന്വേഷണ സംഘത്തിന് മുന്നില് ഹാജരാകും. സ്കൂളിലെ സിസിടിവി ദൃശ്യങ്ങള് ഉള്പ്പെടെ വിശദമായി പരിശോധിക്കും.
രണ്ട് ദിവസത്തിനുള്ളില് വിദ്യാഭ്യാസ വകുപ്പ് മന്ത്രിയ്ക്ക് റിപ്പോര്ട്ട് സമര്പ്പിക്കും. മിഹിര് അഹമ്മദിന്റെ മാതാവ് നല്കിയ പരാതിയില് പോലീസ് അന്വേഷണം പുരോഗമിക്കുകയാണ്. സംഭവവുമായി ബന്ധപ്പെട്ട ഇന്സ്റ്റഗ്രാം ചാറ്റുകള് വീണ്ടെടുക്കാനുള്ള ശ്രമം പൊലീസ് ആരംഭിച്ചിട്ടുണ്ട്. കേസുമായി ബന്ധപ്പെട്ട കൂടുതല് തെളിവുകള് കൈമാറുമെന്ന് കുടുംബം വ്യക്തമാക്കിയിട്ടുണ്ട്.