പോക്സോ കേസില്‍ മുന്‍കൂര്‍ ജാമ്യം തേടി ഫോര്‍ട്ട്‌കൊച്ചിയിലെ നമ്പര്‍ 18 ഹോട്ടലിന്റെ ഉടമ റോയി വയലാട്ട്. റോയി വയലാട്ടും കേസിലെ മറ്റൊരു പ്രതിയായ സൈജു തങ്കച്ചനും ഹൈക്കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിച്ചു.ഭീഷണിപ്പെടുത്തി പണം തട്ടാനാണ് പരാതിക്കാരുടെ ശ്രമമെന്നും പരാതിക്കാരുമായി മുന്‍പരിചയം ഇല്ലെന്നും ഹോട്ടലുടമയുടെ ഹര്‍ജിയില്‍ പറയുന്നു.
കേസില്‍ പ്രതിയായ അഞ്ജലിയാണ് ജോലി വാഗ്ദാനം നല്‍കി തങ്ങളെ കൊച്ചിയില്‍ എത്തിച്ചത് എന്നാണ് പരാതിക്കാരിയുടെ മൊഴി. ബിസിനസ് മീറ്റ് എന്ന് പറഞ്ഞ് ഹോട്ടലിലേക്ക് കൊണ്ടു പോയെന്നും വഞ്ചിക്കപ്പെടുകയാണ് എന്ന് മനസ്സിലായതിനെ തുടര്‍ന്ന് അവിടെ നിന്ന് ര്ക്ഷപ്പെടുകയായിരുന്നു എന്നും മൊഴിയില്‍ പറയുന്നു.
നമ്പര്‍ 18 ഹോട്ടലില്‍ എത്തിയ യുവതിയെയും മകളെയും ഉടമ ഉപദ്രവിച്ചു എന്ന പരാതിയെ തുടര്‍ന്ന് ഫോര്‍ട്ട് കൊച്ചി പൊലീസാണ് കേസെടുത്തിരിക്കുന്നത്. പിന്നീട് മോഡലുകളുടെ മരണം അന്വേഷിക്കുന്ന സംഘത്തിന് പൊലീസ് കേസ് കൈമാറുകയും ചെയ്തു. കോഴിക്കോട് സ്വദേശിയായ യുവതിയാണ് പരാതി നല്‍കിയത്. യുവതിയെയും മകളെയും റോയി ഉപദ്രവിച്ചുവെന്നും ഇത് മറ്റുള്ളവര്‍ മൊബൈല്‍ ഫോണില്‍ ചിത്രീകരിച്ചു എന്നുമാണ് പരാതിയില്‍ പറയുന്നത്.
