കൊച്ചിയിലെ നമ്പര് 18 ഹോട്ടലുമായി ബന്ധപ്പെട്ട പോക്സോ കേസില് രണ്ടാം പ്രതിയായ സൈജു തങ്കച്ചന് കീഴടങ്ങി. കൊച്ചി മെട്രോ പൊലീസ് സ്റ്റേഷനില് എത്തിയാണ് കീഴടങ്ങിയത്. കേസിലെ ഒന്നാം പ്രതിയും നമ്പര്18 ഹോട്ടലുടമയുമായ റോയ് വയലാട്ട് ഇന്നലെ മട്ടാഞ്ചേരി എസിപി ഓഫീസില് കീഴടങ്ങിയിരുന്നു. ഇതിന് പിന്നാലെയാണ് സൈജു കീഴടങ്ങിയിരിക്കുന്നത്.
റോയ് കുറ്റം സമ്മതിച്ചതായി ഇന്നലെ പൊലീസ് അറിയിച്ചിരുന്നു. ഇയാളെ ഇന്ന് കോടതിയില് ഹാജരാക്കും. അതേ സമയം കേസിലെ മൂന്നാം പ്രതിയായ അഞ്ജലി റിമാ ദേവിന് ക്രൈം ബ്രാഞ്ച് നോട്ടീസ് അയച്ചു. ബുധനാഴ്ച ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ടാണ് നോട്ടീസ് നല്കിയിരിക്കുന്നത്.
കേസില് റോയിയുടെയും സൈജു തങ്കച്ചന്റെയും മുന്കൂര് ജാമ്യാപേക്ഷ ഹൈക്കോടതിയും സുപ്രിംകോടതി തള്ളിയിരുന്നു. ഇതേ തുടര്ന്ന് ഇരുവരും ഒളിവില് കഴിയുകയായിരുന്നു. മൂന്നാം പ്രതിയായ അഞ്ജലി റിമാ ദേവിന് ഹൈക്കോടതി ജാമ്യം അനുവദിച്ചിരുന്നു.
2021 ഒക്ടോബറില് ഹോട്ടല് മുറിയില് വെച്ച് റോയി പീഡിപ്പിച്ചു എന്ന് കോഴിക്കോട് സ്വദേശിയായ അമ്മയും മകളുമാണ് പരാതി നല്കിയത്. സംഭവത്തിന്റെ ദൃശ്യങ്ങള് പ്രതികള് മൊബൈല് ഫോണില് പകര്ത്തി. ഇക്കാര്യം പുറത്തു പറഞ്ഞാല് ദൃശ്യങ്ങള് പ്രചരിപ്പിക്കുമെന്ന് അഞ്ജലി ഭീഷണിപ്പെടുത്തിയിരുന്നു എന്നും പരാതിയില് പറയുന്നു. ഫോര്ട്ട്കൊച്ചി പൊലീസ് രജിസ്റ്റര് ചെയ്ത കേസ് പിന്നീട് മോഡലുകളുടെ കേസ് അന്വേഷിച്ച സംഘത്തിന് കൈമാറുകയായിരുന്നു.