കൊച്ചിയിലെ നമ്പര് 18 ഹോട്ടലിലെ പോക്സോ കേസില് ആരോപണവിധേയായ അഞ്ജലി റിമാദേവിന്റെ മൊഴിയില് അന്വേഷണ സംഘത്തിന് അതൃപ്തി. പെണ്കുട്ടിയെ കൊച്ചിയില് എത്തിച്ചു എന്ന് അഞ്ജലി സമ്മതിച്ചു. എന്നാല് നടന്നത് ബിസിനസ് മീറ്റ് മാത്രമാണെന്നാണ് വാദം. കേസില് കൂടുതല് ഡിജിറ്റല് തെളിവുകള് നിരത്തി അഞ്ജലിയെ വീണ്ടും ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം.
മൂന്നാം പ്രതിയായ അഞ്ജലി ഇന്നലെ എറണാകുളം പോക്സോ കോടതിയ്ക്ക് മുമ്പാകെ ഹാജരായിരുന്നു. മുന്കൂര് ജാമ്യവുമായി ബന്ധപ്പെട്ട നടപടിക്കാണ് കോടതിയിലെത്തിയത്. വരും ദിവസങ്ങളില് അന്വേഷണ സംഘത്തിനു മുന്നില് ഹാജരാകുമെന്ന് അറിയിച്ചിരുന്നു. അന്വേഷണവുമായി സഹകരിക്കുമെന്നും സത്യം പുറത്തുവരുമെന്നുമാണ് അഞ്ജലി പറഞ്ഞത്.
കേസില് ഹൈക്കോടതി അഞ്ജലിക്ക് മുന്കൂര് ജാമ്യം അനുവദിച്ചിരുന്നു. കേസിലെ ഒന്നാം പ്രതിയും നമ്പര്18 ഹോട്ടല് ഉടമയുമായ റോയ് വയലാട്ട് പൊലീസില് കീഴടങ്ങിയിരുന്നു. റോയിയുടേയും സുഹൃത്ത് സൈജു തങ്കച്ചന്റേയും മുന്കൂര് ജാമ്യാപേക്ഷ ഹൈക്കോടതിയും സുപ്രീംകോടതിയും തള്ളിയിരുന്നു. ഇരുവരും റിമാന്ഡിലാണ്. പ്രതികള് മൂന്ന് പേരെയും ഇരുത്തി ചോദ്യം ചെയ്യാനായിരുന്നു സംഘത്തിന്റെ നീക്കം.
2021 ഒക്ടോബറില് ഹോട്ടല് മുറിയില് വെച്ച് റോയി പീഡിപ്പിച്ചു എന്ന് കോഴിക്കോട് സ്വദേശിയായ അമ്മയും മകളുമാണ് പരാതി നല്കിയത്. സംഭവത്തിന്റെ ദൃശ്യങ്ങള് പ്രതികള് മൊബൈല് ഫോണില് പകര്ത്തി. ഇക്കാര്യം പുറത്തു പറഞ്ഞാല് ദൃശ്യങ്ങള് പ്രചരിപ്പിക്കുമെന്ന് അഞ്ജലി ഭീഷണിപ്പെടുത്തിയിരുന്നു എന്നും പരാതിയില് പറയുന്നു. ഫോര്ട്ട്കൊച്ചി പൊലീസ് രജിസ്റ്റര് ചെയ്ത കേസ് പിന്നീട് മോഡലുകളുടെ കേസ് അന്വേഷിച്ച സംഘത്തിന് കൈമാറുകയായിരുന്നു.