സംസ്ഥാനത്തെ യുവാക്കളില് വര്ദ്ധിച്ചുവരുന്ന ലഹരി ഉപഭോഗത്തിന് തടയിടാന് കൂടുതല് കളിസ്ഥലങ്ങള് നിര്മ്മിക്കാന് സംസ്ഥാന സര്ക്കാര്. ജലവിഭവ വകുപ്പിന്റെ ഉടമസ്ഥതയിലുള്ള ഉപയോഗ ശൂന്യമായ സ്ഥലത്ത് കളിസ്ഥലം നിര്മിക്കുന്നതിന് അനുമതി നല്കുന്ന കാര്യം അനുഭാവപൂര്വം പരിഗണിക്കുമെന്ന് മന്ത്രി റോഷി അഗസ്റ്റിന് വ്യക്തമാക്കി.
നാട്ടില് കളി സ്ഥലങ്ങള് കുറഞ്ഞു വരികയാണ്. പൊതുസ്ഥലങ്ങളില് നിന്ന് കളി സ്ഥലത്തിന് ആവശ്യമായ ഭൂമി കണ്ടെത്താന് കഴിയാതെ വരുന്ന സാഹചര്യമാണ്. ഇതു മനസിലാക്കിയാണ് ജലവിഭവ വകുപ്പ് ഇത്തരമൊരു തീരുമാനം എടുത്തതെന്നും റോഷി അഗസ്റ്റിന് കൂട്ടിച്ചേര്ത്തു. ലിന്റോ ജോസഫ് എംഎല്എയുടെ ചോദ്യത്തിനുള്ള മറുപടിയായാണ് മന്ത്രി ഇക്കാര്യം അറിയിച്ചത്.
ഓരോ പ്രദേശത്തെയും പഞ്ചായത്തുകളോ മുനിസിപ്പാലിറ്റികളോ കോര്പറേഷനുകളോ കൃത്യമായ പദ്ധതി തയാറാക്കി ആവശ്യപ്പെട്ടാല് വകുപ്പിന് ഭൂമിയുടെ ആവശ്യം കൂടി പരിഗണിച്ച് അപേക്ഷകള് അനുകൂലമായി പരിഗണിക്കും. കളിസ്ഥലത്തിന് ആവശ്യമായ താത്കാലിക നിര്മിതികള്ക്കും അനുമതി നല്കാന് സര്ക്കാര് തയ്യാറാണെന്ന് മന്ത്രി അറിയിച്ചു. യുവാക്കള്ക്കിടയില് ലഹരി ഉപയോഗം പോലുള്ള പ്രവര്ത്തനങ്ങള് കുറയ്ക്കാന് ഇതിലൂടെ സാധിക്കുമെന്നും മന്ത്രി പറഞ്ഞു.