കൊച്ചി മെട്രോയുടെ വടക്കേക്കോട്ട സ്റ്റേഷനിൽ വാരിയൻകുന്നത്ത് കുഞ്ഞഹമ്മദ് ഹാജിയുടെ ചിത്രങ്ങള് സ്ഥാപിച്ചതിനെതിരെ വിശ്വ ഹിന്ദു പരിഷത്ത് വീണ്ടും രംഗത്ത്. വാരിയൻകുന്നത്ത് കുഞ്ഞഹമ്മദ് ഹാജിയുടെ പേരിൽ വിവാദങ്ങൾ ഉണ്ടായിട്ടും പിന്നെയും അദ്ദേഹത്തിന്റെ ചിത്രങ്ങൾ സ്ഥാപിച്ചതിനെതിരെ ഉണ്ടെന്ന് ഹിന്ദുഐക്യവേദി സംസ്ഥാന വർക്കിംഗ് പ്രസിഡന്റ് വത്സൻ തില്ലങ്കേരി പറഞ്ഞു. ഇത്രയും വിവാദങ്ങൾ ഉണ്ടായിട്ടും പിന്നെയും അദ്ദേഹത്തിന്റെ ചിത്രങ്ങൾ സ്ഥാപിച്ചതിന് പിന്നിൽ ഗൂഢമായ ലക്ഷ്യങ്ങൾ ഉണ്ടെന്നും ചിത്രങ്ങൾ മാറ്റാൻ ആവശ്യപ്പെട്ടെന്നും ഉചിതമായ നടപടി ഉണ്ടാകുമെന്നാണ് പ്രതീക്ഷയെന്നും വത്സൻ തില്ലങ്കേരി പറഞ്ഞു.
ചിത്രങ്ങൾ സ്ഥാപിച്ചതിനെതിരെ പ്രതിഷേധവുമായി നേരത്തെയും സംഘടന എത്തിയിരുന്നു. ചിത്രങ്ങൾ നീക്കാൻ ശ്രമിച്ചവരെ പോലീസ് കസ്റ്റഡിയിൽ എടുത്തിരുന്നു. വടക്കേക്കോട്ട മെട്രോ സ്റ്റേഷനിലാണ് വാരിൻകുന്നത്ത് കുഞ്ഞഹമ്മദ് ഹാജിയടക്കമുള്ള മലബാര് കലാപത്തിലെ പഴയകാല നേതാക്കളുടെ ചിത്രം സ്ഥാപിച്ചിട്ടുള്ളത്.
ഓരോ സ്റ്റേഷനിലും ഓരോ തീമിലാണ് ചിത്രങ്ങൾ ചെയ്തിരിക്കുന്നത്. ഇതിന്റെ ഭാഗമായാണ് വടക്കേക്കോട്ട സ്റ്റേഷനില് ഇന്ത്യൻ സ്വാതന്ത്യ സമരത്തില് കേരളത്തിന്റെ പങ്ക് എന്ന വിഷയമാണ് തീരുമാനിച്ചിട്ടുള്ളത്. അവിടെയാണ് മലബാർ കലാപത്തിന്റെ ചിത്രം സ്ഥാപിച്ചത്.