നിലമ്പൂര് ഉപതിരഞ്ഞെടുപ്പ് പ്രചാരണത്തിന്റെ കൊട്ടിക്കലാശം നാളെ. വ്യാഴാഴ്ചയാണ് വോട്ടെടുപ്പ് നടക്കുന്നത്. ഈ മാസം 23നാണ് തിരഞ്ഞെടുപ്പ് ഫലം പുറത്തുവരിക. അവസാനലാപ്പില് സ്ഥാനാര്ത്ഥികളെല്ലാം ആവേശത്തിലാണ്. എൽഡിഎഫ് യുഡിഎഫ് ബിജെപി സ്വതന്ത്ര സ്ഥാനാർത്ഥികളെല്ലാം നിറഞ്ഞ ആവേശത്തിലാണ്.
നാളെ കൊട്ടിക്കലാശം കഴിഞ്ഞാൽ ബുധനാഴ്ച നിശബ്ദ പ്രചാരണമായിരിക്കും. യുഡിഎഫ്-ജമാഅത്തെ ഇസ്ലാമി ബന്ധം ഉയര്ത്തിയാണ് എല്ഡിഎഫ് പ്രചാരണം കടുപ്പിക്കുന്നതെങ്കില് സര്ക്കാരിന്റേത് ജനവിരുദ്ധ നയങ്ങളെന്ന് പറഞ്ഞാണ് യുഡിഎഫിന്റെ പ്രചാരണം. ബിജെപി സ്ഥാനാര്ത്ഥി മോഹന് ജോര്ജും സ്വതന്ത്രനായി മത്സരിക്കുന്ന തൃണമൂല് കോണ്ഗ്രസ് നേതാവ് പി വി അന്വറും പ്രചാരണ രംഗത്ത് സജീവമാണ്.
നിലമ്പൂര് ഉപതിരഞ്ഞെടുപ്പ് പ്രഖ്യാപത്തിന് തൊട്ടുപിന്നാലെ സ്ഥാനാര്ത്ഥി പ്രഖ്യാപനം നടത്തിയ യുഡിഎഫ് തങ്ങള് ഒരുപടി മുന്നിലെന്നാണ് അവകാശപ്പെടുന്നത്. നിലമ്പൂർ മുൻ എംഎൽഎയും മന്ത്രിയുമായിരുന്ന ആര്യാടന് മുഹമ്മദിന്റെ മകൻ ആര്യാടൻ ഷൗക്കത്ത് മണ്ഡലം പിടിക്കുമെന്ന് തന്നെയാണ് പ്രതീക്ഷ. സ്വരാജ് വന്നതോടെ എല്ഡിഎഫില് ആവേശം ഉയര്ത്തിയെന്നാണ് എൽഡിഎഫിന്റെ പക്ഷം. സ്വരാജിന് വിജയ സാധ്യതയെന്നാണ് സിപിഐഎം സംസ്ഥാന സെക്രട്ടറിയേറ്റ് വിലയിരുത്തിയത്.