ഉരുള്പ്പൊട്ടലില് കാണാതായവർക്കായി പതിമൂന്നാം നാളും നടക്കുന്ന തെരച്ചിലിനിടെ ചാലിയാറിന്റെ തീരത്ത് നിന്ന് 2 ശരീര ഭാഗങ്ങള് കണ്ടെത്തി. മുണ്ടേരി ഇരുട്ടുകുത്തിയില് നിന്നും ചാലിയാർ കൊട്ടുപാറ കടവില് നിന്നുമാണ് ശരീരഭാഗങ്ങള് കണ്ടെത്തിയത്. സൂചിപ്പാറ മേഖലയില് അടക്കം ഇന്നും തെരച്ചില് തുടരുകയാണ്. ഏഴ് സംഘങ്ങളായാണ് കലക്കൻ പുഴ മുതല് സൂചിപ്പാറ മൂന്നാം വെള്ളച്ചാട്ടം വരെ തെരച്ചില് നടത്തുന്നത്.
ഫയർഫോഴ്സ്, എൻഡിആർഎഫ്, ഫോറസ്റ്റ്, സന്നദ്ധപ്രവർത്തകർ ഉള്പ്പെടെയുള്ളവർ വിവിധയിടങ്ങളിലെ തെരച്ചിലില് പങ്കെടുക്കുന്നുണ്ട്. അതേസമയം, ഉരുൾപൊട്ടൽ ദുരന്തത്തിന് ഇരയായി രേഖകൾ നഷ്ടപ്പെട്ടവർക്കായി ഇന്ന് പ്രത്യേക ക്യാമ്പ് നടക്കുന്നുണ്ട്. മേപ്പാടി ഗവ. ഹൈസ്കൂള്, സെന്റ് ജോസഫ് യു.പി സ്കൂള്, മൗണ്ട് താബോര് ഹൈസ്കൂള് എന്നിവിടങ്ങളിലാണ് ക്യാമ്പ് നടക്കുന്നത്. വിവിധ വകുപ്പുകള്, ഐടി മിഷന്, അക്ഷയ എന്നിവയെ ഏകോപിപ്പിച്ചാണ് ക്യാമ്പ് സംഘടിപ്പിക്കുന്നത്.
ഇതിനിടെ, ഉരുൾപൊട്ടലിൽ തിരിച്ചറിയാത്ത മൃതദേഹം, ശരീരഭാഗങ്ങൾ എന്നിവയുടെ ഡിഎൻഎ പരിശോധനാ ഫലം കിട്ടിത്തുടങ്ങി. ഇവ ഇന്ന് മുതൽ ഇത് പ്രസിദ്ധപ്പെടുത്താൻ കഴിയുമെന്നാണ് പ്രതീക്ഷ. ഇതോടെ മരിച്ച അവശേഷിച്ചവരെ കൂടി തിരിച്ചറിയാനായേക്കും. താൽക്കാലിക പുനരധിവാസവുമായി അതിവേഗം മുന്നോട്ട് പോവുകയാണ് സർക്കാർ. 250ൽ അധികം വീടുകൾ ഇതിനോടകം കണ്ടെത്തി കഴിഞ്ഞിട്ടുണ്ട്.