ഫൈബർ ബോട്ട് മുങ്ങി എറണാകുളം മുനമ്പത്ത് കാണാതായവരിൽ ഒരാളുടെ മൃതദേഹം കണ്ടെത്തി. മാലിപ്പുറം സ്വദേശി ശരത്തിന്റെ മൃതദേഹമാണ് കണ്ടെത്തിയത്. അരീക്കോട് ഏഴ് ഭാഗത്തു നിന്നാണ് ശരത്തിന്റെ മൃതദേഹം കണ്ടെത്തിയത്. കാണാതായ മറ്റ് മൂന്ന് പേർക്ക് വേണ്ടിയുള്ള തിരച്ചിൽ തുടരുകയാണ്.
കോസ്റ്റൽ പൊലീസും മറൈൻ എൻഫോമെന്റും കോസ്റ്റ് ഗാർഡുകളും മുനമ്പത്തേയും വൈപ്പിനിലേയും മത്സ്യ തൊഴിലാളികളും മത്സ്യത്തൊഴിലാളികളും ചേർന്നാണ് തിരച്ചിൽ നടത്തുന്നത്. മുനമ്പം തീരത്തു നിന്ന് 10 നോട്ടിക്കൽ മൈൽ പരിധിയിലാണ് തിരച്ചിൽ.
അഞ്ചു പേർക്ക് കയറാവുന്ന ഫൈബർ വള്ളത്തിൽ ഏഴു പേർ കയറിയതും അളവിലും അധികം മീൻ ഉണ്ടായിരുന്നതുമാണ് അപകടത്തിന് കാരണമെന്നാണ് സൂചന. മാലിപ്പുറത്തു നിന്ന് മീന്പിടിക്കാന് പോയ ബോട്ടാണ് മുങ്ങിയത്. ഇന്നലെ വൈകിട്ട് ആറുമണിയോടെ മുനമ്പത്ത് നിന്ന് പത്ത് നോട്ടിക്കല് മൈല് അകലെയാണ് അപകടം നടന്നത്.
മീൻ പിടിച്ച് മടങ്ങുന്നതിനിടെ ബോട്ട് തിരയിൽപ്പെട്ട് മുങ്ങുകയായിരുന്നു. മത്സ്യബന്ധനത്തിന് പോയ വള്ളത്തില് ഏഴ് പേരുണ്ടായിരുന്നു. ഇതില് മൂന്ന് പേരെ ഇന്നലെ രാത്രി രക്ഷപ്പെടുത്തിയിരുന്നു. അപകടത്തില് നിന്ന് രക്ഷപ്പെട്ടവര് എറണാകുളം ജനറല് ആശുപത്രിയില് ചികിൽസയിലാണ്.