കേരളത്തില് കാലവര്ഷം എത്തിയതായി കേന്ദ്ര കാലാവസ്ഥ വകുപ്പിന്റെ അറിയിപ്പ്. കണ്ണൂര് ജില്ലവരെ കാലവര്ഷം എത്തിയതായി അറിയിപ്പിൽ പറയുന്നു. തെക്ക് പടിഞ്ഞാറന് കാലവര്ഷമാണ് കേരളത്തില് എത്തിച്ചേര്ന്നതെന്നാണ് കേന്ദ്ര കാലാവസ്ഥ വകുപ്പ് അറിയിച്ചത്. അതേസമയം തീര മേഖലയില് പ്രത്യേക ജാഗ്രത നിര്ദ്ദേശം നല്കിയിട്ടുണ്ട്.
സംസ്ഥാനത്തെ മുഴുവന് ജില്ലകളിലും ഇന്ന് യെല്ലോ അലര്ട്ട് പ്രഖ്യാപിച്ചു. തിങ്കളാഴ്ച്ച വരെ വ്യാപകമായി മഴ തുടരുമെന്നും മുന്നറിയിപ്പുണ്ട്. കേരളം തീരത്ത് ശക്തമായ പടിഞ്ഞാറന് കാറ്റ് നിലനില്ക്കുന്നുണ്ട്. വ്യാപകമായി ഇടി മിന്നലും കാറ്റും ഉണ്ടാവാന് സാധ്യതയുണ്ട്. ചെറിയ സമയം കൊണ്ട് കൂടുതല് മഴ ലഭിക്കുന്ന പ്രതിഭാസത്തിനാണ് സംസ്ഥാനത്ത് സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു.
മലവെള്ളപ്പാച്ചിലും മിന്നല് പ്രണയങ്ങളും പ്രതീക്ഷിക്കുന്നതിനാല് പൊതുജനങ്ങള് ജാഗ്രത പാലിക്കണമെന്നും കാലാവസ്ഥാ വകുപ്പ് അറിയിച്ചു. ഉയര്ന്ന തിരമാലകള്ക്ക് സാധ്യതയുള്ളതിനാല് തീര മേഖലയില് പ്രത്യേക ജാഗ്രത നിര്ദ്ദേശം നല്കി. കടലില് പോകുന്നതിന് മത്സ്യത്തൊഴിലാളികള്ക്കും നിയന്ത്രണമുണ്ട്. തെക്കന് കേരള തീരം, ലക്ഷദ്വീപ് തീരം എന്നിവിടങ്ങളില് മത്സ്യബന്ധനത്തിന് പോകാന് പാടില്ലെന്നാണ് നിര്ദേശം.
അതേസമയം മഴ ശക്തിപ്പെടുന്നതിനാല് സാഹചര്യങ്ങള് വിലയിരുത്തി മലയോര മേഖലയിലേക്കുള്ള രാത്രി യാത്രകള്ക്ക് നിയന്ത്രണമേര്പ്പെടുത്തണമെന്ന് ദുരന്ത നിവാരണ അതോറിറ്റി നിര്ദ്ദേശിച്ചു. വിനോദ സഞ്ചാരികളിലേക്ക് സുരക്ഷാ മുന്നറിയിപ്പുകള് എത്തി എന്നുറപ്പാക്കണമെന്നും നിർദേശമുണ്ട്. നിര്മ്മാണ പ്രവര്ത്തനങ്ങളോ അറ്റകുറ്റപ്പണികളോ നടക്കുന്ന ദേശീയ പാത, സംസ്ഥാന പാത, മറ്റ് റോഡുകള് എന്നിവിടങ്ങളില് സുരക്ഷ ബോര്ഡുകള് യാത്രക്കാര്ക്ക് കാണുന്ന തരത്തില് ഉണ്ടെന്ന് ഉറപ്പാക്കണം. റോഡുകളില് കുഴികളോ മറ്റ് അപകട സാധ്യതകളോ ഉള്ള ഇടങ്ങളില് അടിയന്തരമായി അപകട സാധ്യത ലഘൂകരിക്കാന് വേണ്ട ഇടപെടല് നടത്തണമെന്നും ദുരന്ത നിവാരണ അതോറിറ്റി നിര്ദേശിച്ചു.