കാണാതായ റിയല് എസ്റ്റേറ്റ് ഇടനിലക്കാരന് മുഹമ്മദ് ആറ്റൂരിന്റെ (മാമി) ഡ്രൈവറായ എലത്തൂർ സ്വദേശി രജിത് കുമാറിനെയും ഭാര്യയെയും ഗുരുവായൂരിൽ നിന്ന് കണ്ടെത്തി. ഇരുവരും ഗുരുവായൂരിൽ മുറിയെടുത്തതായി പോലീസ് അന്വേഷണത്തിൽ നിന്ന് വ്യക്തമായി. രജിത് കുമാറിനെയും ഭാര്യ തുഷാരയെയും ഇന്നലെ മുതലേ കാണാനില്ലെന്ന് പരാതി ഉണ്ടായിരുന്നു.
മാമി തിരോധാനത്തിൽ രണ്ട് തവണ രജിത്തിനെ ചോദ്യം ചെയ്യാനായി ക്രൈംബ്രാഞ്ച് വിളിപ്പിച്ചിരുന്നു. 2024 ഓഗസ്റ്റ് 21-നാണ് റിയൽ എസ്റ്റേറ്റ് ഇടനിലക്കാരനായ മാമിയെ കാണാതായത്. തലക്കുളത്താണ് മാമിയുടെ ഫോണിന്റെ അവസാന ലൊക്കേഷന് കാണിച്ചിരുന്നത്. പിന്നീട് വിവരങ്ങൾ ഒന്നും തന്നെ ലഭിച്ചിരുന്നില്ല.
സിസിടിവി ദൃശ്യങ്ങളും ബാങ്ക് ഇടപാടുകളും മൊബൈല് ടവര് ലൊക്കേഷനും ഉള്പ്പെടെ പരിശോധിച്ച് അന്വേഷണം നടത്തിയിട്ടും കാര്യമായ വിവരങ്ങളൊന്നും ലഭിച്ചിരുന്നില്ല. കേസ് അന്വേഷണം ശരിയായ വഴിക്കല്ല പോകുന്നതെന്ന് ആരോപിച്ച് എംഎൽഎ പിവി അൻവർ രംഗത്ത് എത്തിയിരുന്നു.