ശമ്പള പരിഷ്കരണം നടപ്പാക്കണമെന്ന് ആവശ്യപ്പെട്ട് സര്ക്കാര് മെഡിക്കല് കോളജ് ഡോക്ടര്മാര് ഈ മാസം 27-ാം തിയതി മുതല് നടത്താനിരുന്ന അനിശ്ചിതകാല സമരം മാറ്റിവെച്ചു. ആവശ്യങ്ങള് പരിഗണിക്കാമെന്നും ചര്ച്ച നടത്താമെന്നും ആരോഗ്യമന്ത്രി കെ.കെ ശൈലജ ഉറപ്പ് നല്കിയതിനെ തുടര്ന്നാണ് സമരം തത്കാലത്തേക്ക് മാറ്റി വെച്ചത്. ഇതേ ആവശ്യമുന്നയിച്ച് നവംബര് 20-ന് രാവിലെ രണ്ട് മണിക്കൂര് ഒപി ബഹിഷ്കരിച്ച് സര്ക്കാര് ഡോക്ടര്മാര് നടത്തിയ സൂചനാസമരത്തില് സാധാരണക്കാരായ രോഗികള് വലഞ്ഞിരുന്നു.
ചര്ച്ചയില് ആവശ്യങ്ങള് അംഗീകരിച്ചില്ലെങ്കില് വീണ്ടും സമരത്തിലേക്ക് പോകാന് മടിക്കില്ലെന്ന് ഡോക്ടര്മാരുടെ സംഘടനകള് അറിയിച്ചു. നിരവധി രോഗികള് സംസ്ഥാനത്തിന്റെ വിവിധ ഭാഗങ്ങളില് നിന്ന് എത്തുന്ന തിരുവനന്തപുരം, എറണാകുളം, കോഴിക്കോട് മെഡിക്കല് കോളജുകളിലെ ഒപികള് അല്പസമയം തടസ്സപ്പെട്ടാല് തന്നെ അത് ബാധിക്കുന്നത് ആയിരക്കണക്കിന് രോഗികളെയാണ്.
കേരള മെഡിക്കല് കോളജ് ടീച്ചേഴ്സ് അസോസിയേഷനാണ് ശമ്പളപരിഷ്കരണം ഉടന് വേണമെന്ന് ആവശ്യപ്പെട്ട് ബുധനാഴ്ച സൂചനാ സമരം നടത്തിയത്. എന്നാല് അത്യാഹിത വിഭാഗം, ലേബര് റൂം, ഐസിയു തുടങ്ങിയ വിഭാഗങ്ങളുടെ പ്രവര്ത്തനത്തെ സമരം ബാധിച്ചിരുന്നില്ല.
2006-ലാണ് അവസാനമായി സര്ക്കാര് മെഡിക്കല് കോളജ് അധ്യാപകര്ക്ക് ശമ്പളപരിഷ്കരണം ലഭിച്ചത്. 2016-ല് വീണ്ടും ശമ്പളം പരിഷ്കരിക്കേണ്ടിയിരുന്നതാണ്. ഇതുണ്ടായില്ല. ഉടനടി ശമ്പളം കൂട്ടണമെന്ന് ആവശ്യപ്പെട്ട് ഇത് രണ്ടാം തവണയാണ് ഡോക്ടര്മാര് സൂചനാസമരം നടത്തുന്നത്.