തമിഴ്നാട്ടിലെ കൃഷ്ണഗിരിയിൽ ശൈശവ വിവാഹത്തിന് കേസെടുത്ത് പൊലീസ്. സാമൂഹിക ക്ഷേമ വിഭാഗം നല്കിയ പരാതിയിൽ വരനടക്കം അഞ്ച് പേര്ക്കെതിരെ കേസ് കൃഷ്ണഗിരി പൊലീസ് കേസെടുത്തിരിക്കുന്നത്. പെണ്കുട്ടി സ്കൂളില് താലി ധരിച്ചെത്തിയത് ശ്രദ്ധയില്പ്പെട്ടതോടെയാണ് സംഭവം പുറത്ത് വന്നത്.
14 വയസ്സുകാരിയുടെ വിവാഹം നടത്തിയെന്ന പരാതിയിലാണ് കേസ് എടുത്തിരിക്കുന്നത്. വരനും മാതാപിതാക്കളും പെണ്കുട്ടിയുടെ മാതാപിതാക്കളും ഉള്പ്പെടെയാണ് അഞ്ച് പേര്ക്കെതിരെ കേസെടുത്തത്. പെണ്കുട്ടി സ്കൂളില് താലി ധരിച്ചെത്തിയത് ശ്രദ്ധയില്പ്പെട്ടതോടെ അധ്യാപകര് സാമൂഹിക ക്ഷേമ വകുപ്പിനെ അറിയിക്കുകയായിരുന്നു. 25 കാരനാണ് വരന്. പുലര്ച്ചെയാണ് പെണ്കുട്ടിയുടെ വിവാഹം നടന്നതെന്നും ശേഷം സ്കൂളിലേക്ക് വരികയായിരുന്നുവെന്നും സാമൂഹിക ക്ഷേമ വകുപ്പ് നടത്തിയ അന്വേഷണത്തില് കണ്ടെത്തി.
ഒരു ആഘോഷത്തിനായി താന് പുതിയ വസ്ത്രങ്ങള് വാങ്ങിച്ചെന്നും അതിന് ശേഷം സ്കൂളിലേക്ക് വരുമെന്നും പെണ്കുട്ടി സുഹൃത്തുക്കളോട് പറഞ്ഞിരുന്നു. എന്നാല് താലി ധരിച്ച് യൂണിഫോമില് തന്നെയാണ് വിദ്യാര്ത്ഥി സ്കൂളിലെത്തിയത്. ഇതിനെ തുടർന്ന് സുഹൃത്തുക്കള് തിരക്കിയപ്പോള് വിവാഹം കഴിഞ്ഞെന്ന് പെണ്കുട്ടി വെളിപ്പെടുത്തുകയായിരുന്നു. ക്ഷേത്രത്തിന് മുന്നില്വെച്ച് ഇരുട്ടിലായിരുന്നു വിവാഹമെന്നും പെണ്കുട്ടി പറഞ്ഞിരുന്നു. തുടർന്ന് സാമൂഹിക ക്ഷേമ വിഭാഗം പരാതി നൽകുകയായിരുന്നു.