എൽ ഡി എഫിന് ആലപ്പുഴയിൽ മാത്രമാണ് നേരിയ ലീഡുള്ളത്. ഇപ്പോൾ 1639 വോട്ടിന്റെ ലീഡ് മാത്രമാണ് ഇവിടെ സി പി എം സ്ഥാനാർത്ഥി എ എം ആരിഫിനുള്ളത്. ആലപ്പുഴയിൽ ലീഡ് മാറി മറിയുന്ന സ്ഥിതിയുള്ളതിനാൽ ഇവിടെ വിജയം ഇടതിന് ഉറപ്പിക്കാൻ കഴിയില്ല. എന്നാൽ മറ്റു 19 സീറ്റുകളിലും യു ഡി എഫിന്റെ സ്ഥാനാർത്ഥികൾ വ്യക്തമായ ലീഡ് നേടി വിജയം ഏറെക്കുറെ ഉറപ്പിച്ച് കഴിഞ്ഞു.
താൻ പരാജയപ്പെടാൻ സാധ്യതയുണ്ടെന്ന് തുറന്നു പറഞ്ഞ ടി എൻ പ്രതാപൻ തൃശൂരിൽ നിലവിൽ 12,000 വോട്ടുകളുടെ നേട്ടത്തോടെ മുന്നിലെത്തിയിട്ടുണ്ട്. ബി ജെ പി ഏറെ പ്രതീക്ഷ വെച്ചിരുന്ന ഈ മണ്ഡലത്തിൽ സുരേഷ് ഗോപി മൂന്നാം സ്ഥാനത്താണ്. പാലക്കാട്ട് വി കെ ശ്രീകണ്ഠന് ഇപ്പോൾ 27,155 വോട്ടുകളുടെ ലീഡുണ്ട്.
വയനാട്ടിൽ രാഹുൽ ഗാന്ധിയുടെ ലീഡ് ഒരു ലക്ഷം കടന്നു. ശക്തമായ മത്സരം നടന്ന വടകരയിൽ കോൺഗ്രസ് സ്ഥാനാർത്ഥി കെ മുരളീധരൻ മുന്നിലെത്തി. കഴിഞ്ഞ എല്ലാ റൗണ്ടുകളിലും മുരളീധരൻ തന്നെയായിരുന്നു മുന്നിൽ.