താല്ക്കാലിക വൈസ് ചാന്സിലര്മാരെ നിയമിക്കേണ്ടത് സംസ്ഥാന സര്ക്കാര് നല്കുന്ന പാനലില് നിന്നാകണമെന്ന ഹൈക്കോടതി വിധി ഗവര്ണറുടെ ധിക്കാരത്തിനുള്ള തിരിച്ചടിയും, ഫെഡറല് തത്വങ്ങളെ ഉയര്ത്തിപ്പിടിക്കുന്നതുമാണെന്ന് സിപിഎം സംസ്ഥാന സെക്രട്ടറിയേറ്റ്.
കേരള സാങ്കേതിക സര്വ്വകലാശാല, ഡിജിറ്റല് സര്വ്വകലാശാല എന്നിവിടങ്ങളില് സര്ക്കാര് പാനലിനെ തള്ളിക്കളഞ്ഞുകൊണ്ട് നിയമനം നടത്തിയ മുന് ഗവര്ണര് ആരിഫ് മുഹമ്മദ് ഖാന്റെ നടപടിയെയാണ് ഹൈക്കോടതി തള്ളിക്കളഞ്ഞത്. മെയ് 28-ാം തിയ്യതി വി.സിമാരുടെ കാലാവധി അവസാനിക്കുന്നതുകൊണ്ടാണ് നിയമനത്തില് ഇടപെടാത്തത് എന്ന കോടതിയുടെ നിലപാട് ഭാവിയില് ഇത്തരം കാര്യങ്ങള് ആവര്ത്തിക്കാന് പാടില്ലെന്ന ശക്തമായ താക്കീതാണ്.
സാങ്കേതിക സര്വ്വകലാശാല നിയമപ്രകാരം താല്ക്കാലിക വി.സി നിയമനം സര്ക്കാര് നല്കുന്ന പട്ടികയില് നിന്ന് ആകണമെന്ന ഹൈക്കോടതി വിധി മറികടന്നുകൊണ്ടാണ് ഗവര്ണര് നിയമനം നടത്തിയത്. ഗവര്ണര്മാരെ ഉപയോഗിച്ച് രാഷ്ട്രീയ താല്പര്യം നടപ്പിലാക്കാന് ശ്രമിക്കുന്ന ബി.ജെ.പി സര്ക്കാരിനുള്ള ശക്തമായ താക്കീത് കൂടിയാണ് ഈ വിധി.
ഫെഡറല് തത്വങ്ങളെ ലംഘിച്ചുകൊണ്ട് കാവിവല്ക്കരണം സര്വ്വകലാശാലകളില് മുന് ഗവര്ണര് നടത്തിയപ്പോള് അതിനൊപ്പം നിന്ന യു.ഡി.എഫിന്റെ രാഷ്ട്രീയ നിലപാടുകള്ക്കുള്ള തിരിച്ചടിയാണ് ഈ കോടതി വിധിയെന്നും സി.പിഎം സംസ്ഥാന സെക്രട്ടറിയേറ്റ് പ്രസ്താവനയില് പറഞ്ഞു.