സര്വീസില് നിന്ന് പുറത്താക്കാന് സഖ്യ കക്ഷികള് ആവര്ത്തിച്ച് ആവശ്യപ്പെട്ടിട്ടും എഡിജിപി എംആര് അജിത്കുമാറിന് സംരക്ഷണ കവചം തീര്ത്ത് മുഖ്യമന്ത്രി പിണറായി വിജയന്. അജിത്കുമാര് ആര്എസ്എസ് നേതാക്കളുമായി കൂടിക്കാഴ്ച നടത്തിയ സംഭവത്തില് സിപിഎമ്മിന്റെ സഖ്യ കക്ഷികള് എഡിജിപിയ്ക്കെതിരെ നടപടി ആവശ്യപ്പെട്ട് നേരെത്തെ രംഗത്തെത്തിയിരുന്നു.
ഇന്ന് ചേര്ന്ന എല്ഡിഎഫ് യോഗത്തിലും വിഷയം ചര്ച്ചയായെങ്കിലും അജിത്കുമാറിനെതിരെ നടപടിയെടുക്കാന് ആഭ്യന്തര മന്ത്രികൂടിയായ പിണറായി വിജയന് തയ്യാറായില്ല. എംആര് അജിത്കുമാറിനെതിരെയുള്ള അന്വേഷണം ഡിജിപിയുടെ പരിധിയില് കൊണ്ടുവരാമെന്ന നിലപാട് മാത്രമാണ് മുഖ്യനില് നിന്നുണ്ടായത്.
എന്നാല് സിപിഐ ഉള്പ്പെടെയുള്ള സഖ്യകക്ഷികള് അജിത്കുമാറിനെതിരെ നടപടി വേണമെന്ന നിലപാടില് മാറ്റമില്ലെന്ന് അറിയിച്ചിട്ടുണ്ട്. സിപിഎമ്മിന്റെ സഖ്യകക്ഷിയായ ആര്ജെഡിയും അജിത്കുമാറിനെതിരെ നടപടി വേണമെന്ന നിലപാടിലാണ്. ഇതുകൂടാതെ എന്സിപിയും, ജെഡിഎസും എഡിജിപി വിഷയത്തില് ശക്തമായ നിലപാട് എടുത്തിരുന്നു.
എന്നാല് മുഖ്യമന്ത്രിയുടെ അധ്യക്ഷതയില് ചേര്ന്ന യോഗത്തില് ഘടക കക്ഷികളുടെ ആവശ്യം അംഗീകരിക്കപ്പെട്ടില്ല. കഴിഞ്ഞ ദിവസം ചേര്ന്ന സിപിഐ തൃശൂര് ജില്ലാ കമ്മിറ്റിയുടെ നേതൃത്വത്തില് ചേര്ന്ന യോഗത്തില് സിപിഐ സംസ്ഥാന സെക്രട്ടറി ബിനോയ് വിശ്വവും തൃശൂരിലെ ലോക്സഭ സ്ഥാനാര്ത്ഥി വിഎസ് സുനില് കുമാറും അജിത്കുമാറിനെ മാറ്റണമെന്ന ആവശ്യം ഉന്നയിച്ചിരുന്നു.
തൃശൂര് പൂരം കലക്കാന് എഡിജിപിയുടെ ശ്രമം നടന്നതായി പിവി അന്വര് എംഎല്എ ആരോപണം ഉന്നയിച്ച സാഹചര്യത്തില് എഡിജിപി ആര്എസ്എസ് നേതാക്കളുമായി കൂടിക്കാഴ്ച നടത്തിയത് എന്തിനെന്ന ചോദ്യവും സിപിഐ ഉന്നയിച്ചിരുന്നു. അജിത്കുമാറിന്റെ സന്ദര്ശന ലക്ഷ്യം അറിയാന് തങ്ങള്ക്കും അവകാശമുണ്ടെന്നും ബിനോയ് വിശ്വം വ്യക്തമാക്കിയിരുന്നു.
തിരഞ്ഞെടുപ്പിന് തൊട്ടുമുന്പ് തൃശൂര് പൂരം കലക്കിയതില് രാഷ്ട്രീയ ലക്ഷ്യമുണ്ടെന്ന് സിപിഐ തിരഞ്ഞെടുപ്പ് കാലത്ത് തന്നെ ആരോപിച്ചിരുന്നു. എന്നാല് ഘടക കക്ഷികള്ക്കുള്ള സംശയനിവാരണത്തിന് പോലും ഇന്ന് ചേര്ന്ന എല്ഡിഎഫ് യോഗത്തില് പിണറായി തയ്യാറായില്ല.