നെടുമ്പാശ്ശേരി വിമാനത്താവളം വഴി കസ്റ്റംസിനെ വെട്ടിച്ച് കടത്തിക്കൊണ്ടു വന്ന സ്വര്ണവുമായി രണ്ട് പേര് അറസ്റ്റില്. അഴീക്കോട് ചെമ്മാത്ത്പറമ്പില് സബീല് (44), മലപ്പുറം വള്ളുമ്പറം തൊണ്ടിയില് നിഷാജ് (27) എന്നിവരാണ് അറസ്റ്റിലായത്. മലപ്പുറത്തേക്ക് കൊണ്ടുപോകുകയായിരുന്ന സ്വര്ണമാണ് പിടികൂടിയത്.
ദുബായില് നിന്നും കൊണ്ടുവന്ന സ്വര്ണം നിഷാജാണ് മലപ്പുറത്തേക്ക് കൊണ്ടുപോയത്. സബീലാണ് ദുബായില് നിന്നും സ്വര്ണം കേരളത്തിലെത്തിച്ചത്. ഗൂഗിള്മാപ്പ് നോക്കി സഞ്ചരിച്ച സ്വര്ണക്കടത്ത് സംഘം വഴിതെറ്റിയാണ് പൊലീസിന് മുന്നില് അകപ്പെട്ടത്. വാഹനപരിശോധന നടത്തുന്ന പൊലീസിന് മുന്നിലേക്ക് ഇവര് എത്തിപ്പെടുകയായിരുന്നു.
വെള്ളിയാഴ്ച പുലര്ച്ചെ രണ്ടുമണിയോടെ അഴീക്കോട് ജെട്ടിയില് പൊലീസ് വാഹനപരിശോധന നടത്തുന്നതിനിടെയാണ് ഇവര് പിടിയിലായത്. മലപ്പുറം രജിസ്ട്രേഷനിലുള്ള കാറിലാണ് നിഷാജ് വന്നത്.
വിവരമറിഞ്ഞ് രക്ഷപ്പെടാന് ശ്രമിച്ച സബീലിനെ അണ്ടത്തോട് ഭാഗത്തുനിന്നാണ് അറസ്റ്റ് ചെയ്തത്. ഇവരുടെ കാറും പൊലീസ് കസ്റ്റഡിയില് എടുത്തു.
പശ ചേര്ത്ത് സ്വര്ണത്തരികള് പിടിപ്പിച്ച ട്രൗസറും ടീ ഷര്ട്ടുമാണ് കാറിലുണ്ടായിരുന്നത്. കാറിന്റെ ഗിയര് ബോക്സിലും സ്വര്ണം ഒളിപ്പിച്ചിട്ടുണ്ടായിരുന്നു. വാഹനത്തില് നിന്നു കിട്ടിയ ട്രൗസറിനും ടീ ഷര്ട്ടിനും അസാധാരണഭാരം അനുഭവപ്പെട്ടതിനെ തുടര്ന്നാണ് പൊലീസ് പരിശോധന നടത്തിയത്.