എറണാകുളം-ബംഗളുരു വന്ദേഭാരത് എക്സ്പ്രസ് ഇന്ന് ട്രാക്കിലേക്ക്. പ്രധാനമന്ത്രി നരേന്ദ്ര മോദി വാരാണസിയില് നിന്ന് വെര്ച്യുലായി ഫ്ളാഗ് ഓഫ് ചെയ്യും. കേന്ദ്ര മന്ത്രിമാരായ സുരേഷ് ഗോപി, ജോര്ജ് കുര്യന് ഉള്പ്പെടെയുള്ളവര് ചടങ്ങില് പങ്കെടുക്കും. എറണാകുളം സൗത്ത് റെയില്വേ സ്റ്റേഷനില് നിന്നാണ് ട്രെയിനിന്റെ ഉദ്ഘാടന യാത്ര.
ഇന്നലെ ട്രയല് റണ് വിജയകരമായി പൂര്ത്തിയാക്കിയിരുന്നു. പതിവ് സര്വീസ് അടുത്ത ചൊവ്വാഴ്ച തുടങ്ങുമെന്നാണ് സൂചന. കെഎസ്ആര് ബംഗളൂരുവില് നിന്ന് രാവിലെ 5.10ന് പുറപ്പെടുന്ന ട്രെയിന് ഉച്ചയ്ക്ക് 1.50 ന് എറണാകുളത്തെത്തും. 2.20ന് എറണാകുളത്തു നിന്ന് തിരിച്ച് രാത്രി 11ന് ബംഗളൂരുവിലെത്തും.
ചെയര് കാറിന് 1095യും എക്സിക്യൂട്ടീവ് ചെയര് കാറിനു 2289മാണ് ടിക്കറ്റ് നിരക്ക്. 8 മണിക്കൂര് 40 മിനിറ്റ് സര്വീസ് സമയം. ബുധനാഴ്ചകളില് സര്വീസ് ഉണ്ടാകില്ല. എറണാകുളം-ബംഗളുരു വന്ദേഭാരത് ഈ റൂട്ടിലെ ഏറ്റവും വേഗമേറിയ ട്രെയിന് ആണ്.