തിരുവനന്തപുരം ലോ കോളജില് കഴിഞ്ഞ ദിവസം ഉണ്ടായ കെഎസ് യു-എസ്എഫ്ഐ സംഘര്ഷത്തില് പ്രതികരിച്ച് കെഎസ് യു യൂണിറ്റ് പ്രസിഡന്റ് സഫ്ന. കോളജില് നിന്ന് പുറത്തേക്കു പോകുമ്പോള് എസ്എഫ്ഐ പ്രവര്ത്തകര് വളഞ്ഞിട്ട് ആക്രമിക്കുകയായിരുന്നു എന്നും തന്നെ വലിച്ചിഴച്ചെന്നും സഫ്ന പറയുന്നു.
ആഷിഖ്, മിഥുന് എന്നീ വിദ്യാര്ത്ഥികളെയും കോളജില് വെച്ച് മര്ദ്ദിച്ചുവെന്നും ദേവനാരായണന് എന്ന വിദ്യാര്ത്ഥിയേയും മറ്റ് പത്തുപേരെയും വീട്ടില് ചെന്ന് ആക്രമിച്ചുവെന്നും വനിതാ നേതാവ് പറഞ്ഞു. തേപ്പുപെട്ടി ഉപയോഗിച്ച് തലയ്ക്കടിച്ചുവെന്നും സഫ്ന ആരോപിച്ചു. നേരത്തെയും എസ്എഫ്ഐ ആക്രമണം നടത്തിയിട്ടുണ്ടെന്നും പരാതി നല്കിയിട്ടും പൊലീസും സ്റ്റാഫ് കൗണ്സിലും നടപടി ഒന്നും എടുത്തില്ലെന്നും അവര് പറഞ്ഞു. ഇനിയൊരു വിദ്യാര്ത്ഥിയ്ക്ക് ഈ ഗതിയുണ്ടാവാന് പാടില്ലെന്നും സഫ്ന കൂട്ടിച്ചേര്ത്തു.
കോളജ് യൂണിയല് ഉദ്ഘാടനത്തിനിടെ ഉണ്ടായ വാക്കുതര്ക്കമാണ് സംഘര്ഷത്തില് കലാശിച്ചത്. ഇന്നലെ രാത്രി എട്ട് മണിയോടെയായിരുന്നു സംഭവം. നേരത്തെ കോളജ് യൂണിയന് തിരഞ്ഞെടുപ്പുമായി ബന്ധപ്പെട്ട് തര്ക്കങ്ങള് ഉണ്ടായിരുന്നു. ഇതിന്റെ തുടര്ച്ചയാണ് ഇന്നലത്തെ സംഘര്ഷം.
കെ.എസ്.യു യൂണിറ്റ് പ്രസിഡന്റ് സഫ്ന ഉള്പ്പടെ രണ്ട് പേര്ക്ക് പരിക്കേറ്റു. സഫ്നയെ നിലത്തിട്ട് വലിച്ചിഴക്കുകയും, മര്ദ്ദിക്കുകയും ചെയ്യുന്ന ദൃശ്യങ്ങള് പുറത്തുവന്നു. പരിക്കേറ്റവരെ തിരുവനന്തപുരം മെഡിക്കല് കോളജ് ആശുപത്രിയില് പ്രവേശിപ്പിച്ചു. സംഭവത്തില് കെഎസ്യു നല്കിയ പരാതിയില് തിരുവനന്തപുരം മ്യൂസിയം പൊലീസ് എസ്എഫ്ഐ പ്രവര്ത്തകര്ക്കെതിരെ കേസെടുത്തു.