ജാതി സെന്സസ് നടപ്പാക്കുന്നതില്നിന്ന് കേന്ദ്ര സര്ക്കാര് പിന്മാറണമെന്ന് ആവശ്യപ്പെട്ട് രാഷ്ട്രപതി, ഉപരാഷ്ട്രപതി, പ്രധാനമന്ത്രി, ആഭ്യന്തരമന്ത്രി, ലോക്സഭ സ്പീക്കര് എന്നിവര്ക്ക് എന്എസ്എസ് നിവേദനം നല്കി.
ജാതി സെന്സസ് രാജ്യത്തെ വര്ഗീയവും മതപരവുമായ രീതിയില് വിഭജിക്കുന്നതിലേക്ക് നയിക്കും. ജാതിയുടെയും മതത്തിന്റെയും അടിസ്ഥാനത്തില് സമൂഹം വിഭജിക്കപ്പെടും. ഇത് രാജ്യത്തിന്റെ അഖണ്ഡതയെയും സാഹോദര്യത്തെയും അപകടത്തിലാക്കുമെന്ന് എന്എസ്എസ് നിവേദനത്തില് പറയുന്നു.
ജാതി സെന്സസ് വഴി സംസ്ഥാനം ജാതിയും മതപരവുമായ സ്വത്വം അടിച്ചേല്പ്പിക്കുന്നത് പൗരന്മാരെ ജാതിയുടെയും മതപരവുമായ ദുരിതങ്ങളിലേക്ക് തള്ളിവിടുകയും ദേശീയതയുടെ ആഴത്തിലുള്ള പദവിയെ ദുര്ബലപ്പെടുത്തുകയും ചെയ്യും.
ജാതി സെന്സസില്നിന്ന് വിട്ടുനില്ക്കണമെന്നും രാജ്യത്തിന്റെ സംഖ്യാബലം ശേഖരിക്കുന്നതിനായി സെന്സസ് പരിമിതപ്പെടുത്തണമെന്നും എന്.എസ്.എസ് നിവേദനത്തില് ആവശ്യപ്പെട്ടിട്ടുണ്ട്.
ജാതി സെന്സസില് നിന്നും സര്ക്കാരുകള് പിന്മാറണമെന്നും ജാതി സെന്സസ് നടപ്പിലാക്കിയാല് സംവരണത്തിന്റെ പേരില് കൂടുതല് അഴിമതിക്ക് വഴിതെളിക്കുമെന്നും എന്എസ്എസ് ജനറല് സെക്രട്ടറി ജി. സുകുമാരന്നായര് പറഞ്ഞു.
സംവരണത്തിന്റെ പേരില് നല്കുന്ന ഇളവുകള് വിദ്യാഭ്യാസ രംഗത്തും തൊഴില്രംഗത്തും യോഗ്യതയില് വെള്ളം ചേര്ക്കും. ഭരണഘടന അനുശാസിക്കുന്ന തുല്യത ജാതിമത വ്യത്യാസമില്ലാതെ എല്ലാവര്ക്കും ഉറപ്പാക്കണം. വോട്ടുബാങ്കുകളായ ജാതിവിഭാഗങ്ങളുടെ സമ്മര്ദതന്ത്രങ്ങള്ക്ക് വഴങ്ങുകയും അവരുടെ സംഘടിത ശക്തിക്ക് മുന്പില് അടിയറപറയുകയും ചെയ്യുന്നതരത്തില് വിവിധ രാഷ്ട്രീയപാര്ട്ടികള് സ്വീകരിച്ച പ്രീണന നയത്തിന്റെ ഭാഗമാണ് ജാതി സംവരണത്തിനുള്ള മുറവിളിയെന്നും സുകുമാരന് നായര് പറഞ്ഞു.
സര്ക്കാരുകളുടെ തെറ്റായ നയങ്ങള്ക്കെതിരെ പ്രതികരിക്കാനുള്ള അവകാശം ജനങ്ങള്ക്കെന്നപോലെ മത-സാമുദായിക സംഘടനകള്ക്കും ഉണ്ട്. അത് കൃത്യമായും എന്എസ്എസ് നിര്വഹിച്ചുപോന്നിട്ടുണ്ട്. സമുദായ നീതിക്കും സാമൂഹികനീതിക്കും വേണ്ടിയുള്ള നിലപാടുകള് എന്എസ്എസിന് എന്നുമുണ്ടാവും. സര്ക്കാരുകളുടെ തെറ്റായ നയങ്ങളെ എതിര്ക്കുകയും, നല്ല കാര്യങ്ങളോട് സഹകരിക്കുകയും എന്എസ്എസിന്റെ പൊതുനയമാണ്. ഇനിയും അതേനയം തുടരും. കേന്ദ്ര സംസ്ഥാന സര്ക്കാരുകള് നായര് സര്വീസ് സൊസൈറ്റിയോടു നല്ല സമീപനം പാലിക്കുന്നുവെന്നും എല്ലാ രാഷ്ട്രീയ പാര്ട്ടികളോടും സമദൂരനിലപാട് ആയിരിക്കും സ്വീകരിക്കുകയെന്നും സുകുമാരന് നായര് പറഞ്ഞു.