നിയമസഭാ തിരഞ്ഞെടുപ്പിൽ വിജയിച്ച് വിണ്ടും മുഖ്യമന്ത്രിയാവുക എന്ന പിണറായി വിജയന്റെ മോഹം മലർപ്പൊടിക്കാരന്റെ സ്വപ്നം മാത്രമെന്ന് രാജ്മോഹൻ ഉണ്ണിത്താൻ.
പിണറായി വിജയൻ വിചാരിക്കുന്നത് പോലെ നിസാരമല്ല ഈ തിരഞ്ഞെടുപ്പ്. കോൺഗ്രസിന്റെ ആവനാഴിയിലെ അവസാനത്തെ ആയുധവും ഒരു സർക്കാർ ഉണ്ടാക്കാൻ ഞങ്ങൾ പുറത്തെടുക്കുമെന്ന് അദ്ദേഹം പറഞ്ഞു.
ഭരണത്തുടർച്ചയ്ക്കായി മറ്റൊരു കാലത്തും ഇല്ലാത്ത രീതിയിലുള്ള പിആർ വർക്ക് ഈ സർക്കാർ നടത്തുകയാണെന്നും അദ്ദേഹം കുറ്റപ്പെടുത്തി. ഏഷ്യാനെറ്റ് ന്യൂസിന്റെ ചാറ്റ് വാക്ക് പരിപാടിയിൽ സംസാരിക്കുകയായിരുന്നു അദ്ദേഹം.
ഏത് മാധ്യമമെടുത്താലും പരസ്യത്തിന്റെ പെരുമഴക്കാലമാണ്. ഇത്രയും പരസ്യം ഒരു സർക്കാരും ഒരു കാലത്തും കൊടുത്തിട്ടില്ല. വീക്ഷണവും ജയ്ഹിന്ദും എല്ലാം നടന്നു പോവുന്നത് സർക്കാരിന്റെ പരസ്യം കൊണ്ടാണെന്നും അദ്ദേഹം പറഞ്ഞു.
കോവിഡ് 19ന് ശേഷം മുഖ്യമന്ത്രി പിണറായി വിജയൻ വാർത്താസമ്മേളനങ്ങളിലൂടെ ജനഹൃദങ്ങളിൽ കയറിയെന്നും അദ്ദേഹം സമ്മതിച്ചു. പിണറായിയുടെ പഴയ മുഖമല്ല ഇപ്പോഴുളളതെന്നും കുറേ ആളുകളെ ആകർഷിക്കാൻ കഴിഞ്ഞെന്നത് നഗ്നസത്യമാണെന്നും ഉണ്ണിത്താൻ പറഞ്ഞു.
ഇത്തവണത്തെ തിരഞ്ഞെടുപ്പിൽ കോൺഗ്രസ് അധികാരത്തിൽ വന്നില്ലെങ്കിൽ ഇന്ത്യക്ക് സ്വാതന്ത്ര്യം നേടിത്തന്ന ഇന്ത്യൻ നാഷണൽ കോൺഗ്രസ് എന്നൊരു പാർട്ടി കേരളത്തിൽ ഉണ്ടായിരുന്നുവെന്ന് ചരിത്രത്തിന്റെ താളുകളിൽ രേഖപ്പെടുത്തേണ്ടി വരും എന്നും അദ്ദേഹം കൂട്ടിചേർത്തു.