സംസ്ഥാനത്ത് പക്ഷിപ്പനി വർദ്ധിക്കുന്ന സാഹചര്യത്തിൽ കേരളത്തിന് മാത്രമായി പ്രത്യേക നിരീക്ഷണ സംവിധാനം ഏർപ്പെടുത്തും. പക്ഷിപ്പനി നേരിടുന്നതിന് വേണ്ടിയാണ് ഈ സംവിധാനം. അതേസമയം പക്ഷിപ്പനി നിയന്ത്രണത്തിനും പ്രതിരോധത്തിനുമായി പ്രത്യേക കര്മ്മ പദ്ധതി രൂപികരിക്കുന്നതിനും തീരുമാനമായി.
പക്ഷിപ്പനി പടരുന്ന സാഹചര്യത്തില് മൃഗ സംരക്ഷണ, ക്ഷീര വികസന വകുപ്പ് മന്ത്രി ജെ. ചിഞ്ചുറാണിയുടെ നേതൃത്വത്തില് കേന്ദ്ര മൃഗസംരക്ഷണ വകുപ്പ് കമ്മീഷണറുമായി ഓണ്ലൈനായി യോഗം ചേര്ന്നു. പക്ഷിപ്പനിയെക്കുറിച്ച് പഠിക്കുന്നതിന് രൂപീകരിച്ച വിദഗദ്ധ സംഘവും ചര്ച്ചയില് പങ്കെടുത്തു. ഈ യോഗത്തിലാണ് തീരുമാനം ഉണ്ടായത്.
പഠന റിപ്പോര്ട്ട് ഭോപ്പാലിലെ നാഷണല് ഇന്സ്റ്റ്യൂട്ട് ഓഫ് ഹൈ സെക്യൂരിറ്റി അനിമല് ഡിസീസസിലേയും ബാംഗ്ലൂരിലെ നാഷണല് ഇന്സ്റ്റിറ്റ്യൂട്ട് ഓഫ് വെറ്ററിനറി എപ്പി ഡെമോളജി ആന്റ് ഡിസീസ് ഇന്ഫോര്മാറ്റിക്സിലേയും വിദഗദ്ധരുടെ മേല് നോട്ടവും പഠനത്തില് ഉണ്ടാകും എന്ന് മൃഗസംരക്ഷണ വകുപ്പ് അധികൃതര് അറിയിച്ചു. ഇത് വഴി പക്ഷിപ്പനിയെ നേരിടുകയാണ് ലക്ഷ്യം.
അതേസമയം ആലപ്പുഴയില് കാക്കകള് കൂട്ടത്തോടെ ചത്തത് പക്ഷിപ്പനിമൂലമെന്ന് സ്ഥിരീകരണം വന്നിരുന്നു. ഭോപ്പാല് ലാബിലെ പരിശോധനയിലാണ് പക്ഷിപ്പനി സ്ഥിരീകരിച്ചത്. കേരളത്തില് ഇതാദ്യമായാണ് കാക്കകളില് പക്ഷിപ്പനി സ്ഥിരീകരിക്കുന്നത്. ഏതാനും ദിവസങ്ങള്ക്ക് മുന്പ് ആലപ്പുഴയിലെ മുഹമ്മയിലെ ചില ഭാഗങ്ങളില് കാക്കകള് കൂട്ടത്തോടെ ചത്തിരുന്നു. തുടര്ന്ന് നടത്തിയ സാമ്പിള് പരിശോധനയിലാണ് പക്ഷിപ്പനി സ്ഥിരീകരിച്ചത്.