ഷുഹൈബ് വധക്കേസിലെ പ്രതി ആകാശ് തില്ലങ്കേരിയുടെ ജീപ്പ് പൊലീസ് കസ്റ്റഡിയിൽ. നിയമലംഘനം നടത്തി ആകാശ് തില്ലങ്കേരി ഉപയോഗിച്ച ജീപ്പ് മോട്ടോർവാഹനവകുപ്പ് പൊലീസിന് കൈമാറി. രൂപമാറ്റം വരുത്തിയത് നേരെയാക്കിയാണ് വാഹനം ഹാജരാക്കിയത്. വാഹനം മലപ്പുറത്ത് നിന്ന് പനമരത്തെത്തിച്ചു.
ഇക്കഴിഞ്ഞ ദിവസമാണ് ആകാശ് തില്ലങ്കേരിയും സുഹൃത്തുക്കളും നിയമങ്ങള് കാറ്റില്പ്പറത്തി വയനാട് പനമരം ടൗണില്ണ് യാത്ര നടത്തിയത്. നമ്പര് പ്ലേറ്റില്ലാത്ത വാഹനത്തില് സീറ്റ് ബെല്റ്റ് ധരിക്കാതെയായിരുന്നു യാത്ര. മോഡിഫൈ ചെയ്ത വാഹനത്തിലുള്ള യാത്രയുടെ ദൃശ്യങ്ങള് ആകാശ് തില്ലങ്കേരി സാമൂഹ്യ മാധ്യമങ്ങളില് പങ്കുവച്ചിരുന്നു. ആകാശിനൊപ്പം മറ്റ് രണ്ടുപേരും ദൃശ്യങ്ങളിലുണ്ട്.
മോട്ടോർ വാഹനനിയമം ലംഘിച്ചുള്ള ആകാശ് തില്ലങ്കേരിയുടെ നിയമവിരുദ്ധ യാത്രയിൽ കർശന നടപടിയെടുക്കാൻ ഹൈക്കോടതി നിർദേശിച്ചിരുന്നു. സംഭവത്തിൽ സ്വമേധയാ കേസെടുക്കുമെന്നും ഹൈക്കോടതി അറിയിച്ചിരുന്നു. പൊതുസ്ഥലത്ത് നിയമം ലംഘിച്ചത് ക്രിമിനൽ കേസിലെ പ്രതിയാണെന്നും ഹൈക്കോടതി വിമർശിച്ചിരുന്നു.
കണ്ണൂരില് നിന്നും വയനാട്ടിലേക്കായിരുന്നു ആകാശ് തില്ലങ്കേരിയുടെയും സുഹൃത്തുക്കളുടെയും യാത്ര. സംഭവത്തിന് പിന്നാലെ യൂത്ത് കോൺഗ്രസ് നൽകിയ പരാതിയുടെ അടിസ്ഥാനത്തിൽ വയനാട് ആര്ടിഒ അന്വേഷണത്തിന് ഉത്തരവിട്ടിരുന്നു. അതേസമയം ഇക്കഴിഞ്ഞ ദിവസം ആകാശ് തില്ലങ്കേരിക്ക് ലൈസൻസ് ഇല്ലെന്ന് വ്യക്തമാക്കി മോട്ടോർ വാഹന വകുപ്പ് രംഗത്തെത്തിയിരുന്നു. ഇതുസംബന്ധിച്ച് വയനാട് എൻഫോഴ്സ്മെൻ്റ് ആർടിഒക്ക് റിപ്പോർട്ട് നൽകി.