ദുരന്ത മുഖത്തുനിന്നും പിന്മാറാതെ ഓഖി കേരളത്തിന്റെ തീരപ്രദേശങ്ങളെ വേട്ടയാടുന്നു. സംസ്ഥാനത്തിന്റെ വിവിധ ഭാഗങ്ങളിൽ വീണ്ടും ശക്തമായ കടൽക്ഷോഭം അനുഭപ്പെട്ടിരിക്കുകയാണ്. ആലപ്പുഴ, കോഴിക്കോട്, കൊച്ചി എന്നിവിടങ്ങളിൽ രാത്രി വൈകിയും ശക്തമായ കടൽക്ഷോഭം തുടരുകയാണ്.
തീര പ്രദേശങ്ങളിൽ കൂടുതൽ ശക്തിയിൽ തിരയടിക്കാൻ തുടങ്ങിയതോടെ നാട്ടുകാർ ആശങ്കയിലാണ്. ആലപ്പുഴയിൽ ആറാട്ടുപുഴ, തുമ്പോളി, അമ്പലപ്പുഴ, പുറക്കാട് തീരത്തും കോഴിക്കോട്- കൊയിലാണ്ടി, കാപ്പാട്, കപ്പക്കല്ല് പ്രദേശത്തും ശക്തമായ കടൽക്ഷോഭം ഉണ്ടായി.
കൊച്ചി എടവനക്കാട് മേഖലയിലും കടൽക്ഷോഭം റിപ്പോർട്ട് ചെയ്തിട്ടുണ്ട്. കാപ്പാട് തൂവപ്പാറയിൽ തീരത്ത് നിന്നും ആൾക്കാരെ ഒഴിപ്പിച്ചു തുടങ്ങി. കോഴിക്കോട് കൊതി അഴിമുഖത്തും കടൽ വെള്ളം ശക്തമായി കരയിലേക്ക് കയറുകയാണ്. പ്രദേശവാസികൾ വെള്ളത്തിൽ അകപ്പെട്ട അവസ്ഥയാണിപ്പോൾ.