നടിയെ ആക്രമിച്ച കേസില് മെമ്മറി കാര്ഡ് തുറന്ന് പരിശോധിച്ചതിന് എതിരായ അതിജീവിതയുടെ ഹർജി തള്ളി ഹൈക്കോടതി. ജസ്റ്റിസ് സിഎസ് ഡയസ് അധ്യക്ഷനായ സിംഗിള് ബെഞ്ചാണ് ഹര്ജി തള്ളിയത്. മെമ്മറി കാര്ഡിലെ വസ്തുതാ അന്വേഷണ റിപ്പോര്ട്ടിന്മേല് കേസെടുക്കാന് നിര്ദ്ദേശം നല്കണമെന്ന് ആവശ്യപ്പെട്ടായിരുന്നു അതിജീവിതയുടെ ഉപഹര്ജി.
ഹര്ജി നിയമപരമായി നിലനില്ക്കില്ലെന്ന് വ്യക്തമാക്കിയാണ് കോടതി ഹർജി തള്ളിയത്. അതിജീവിതയ്ക്ക് പുതിയ ഹര്ജിയുമായി ഹൈക്കോടതിയെ സമീപിക്കാമെന്ന് ഹൈക്കോടതി ഡിവിഷൻ ബെഞ്ച് വ്യക്തമാക്കി. അതേസമയം പുതിയ ഹർജി നൽകുമെന്ന് അതിജീവിത പ്രതികരിച്ചു.
എറണാകുളം പ്രിന്സിപ്പല് സെഷന്സ് കോടതി നടത്തിയ അന്വേഷണ റിപ്പോര്ട്ടിന് അനുസരിച്ച് കേസെടുത്തിട്ടില്ല. കേസെടുക്കാന് നിര്ദ്ദേശം നല്കണമെന്നായിരുന്നു ഉപഹര്ജിയിലെ ആവശ്യം. കോടതിയുടെ കസ്റ്റഡിയിലിരിക്കെ മെമ്മറി കാര്ഡ് പരിശോധിച്ചതിലായിരുന്നു എറണാകുളം പ്രിന്സിപ്പല് സെഷന്സ് കോടതിയുടെ അന്വേഷണം. കേസിലെ സുപ്രധാന തെളിവായ മെമ്മറി കാര്ഡ് കോടതിയുടെ കസ്റ്റഡിയിലിരിക്കെ മൂന്ന് തവണയാണ് നിയമ വിരുദ്ധമായി പരിശോധിക്കപ്പെട്ടത്.