വിവാഹത്തിന് മുമ്പ് വധുവിനും വരനും വിവാഹപൂര്വ കൗണ്സിലിംഗ് നിര്ബന്ധമാക്കണമെന്ന ആവശ്യം മുന്നോട്ട് വച്ച് കേരള വനിതാ കമ്മിഷന് അധ്യക്ഷ അഡ്വ. പി. സതീദേവി. വിവാഹം രജിസ്റ്റര് ചെയ്യാനായി വിവാഹപൂര്വ കൗണ്സിലിംഗ് സര്ട്ടിഫിക്കറ്റ് നിര്ബന്ധമാക്കണമെന്നും പി. സതീദേവി ആവശ്യപ്പെട്ടു. ഇത് സംബന്ധിച്ച ശിപാര്ശ സംസ്ഥാന സര്ക്കാരിന് നൽകിയെന്നും വനിതാ കമ്മിഷന് അധ്യക്ഷ അറിയിച്ചു.
ആലപ്പുഴ ജില്ല പഞ്ചായത്ത് ജെന്ഡര് പാര്ക്ക് ഓഡിറ്റോറിയത്തില് നടത്തിയ ജില്ലാതല അദാലത്തിനുശേഷം സംസാരിക്കുകയായിരുന്നു അഡ്വ. പി. സതീദേവി. വനിതാ കമ്മിഷന്റെ ആഭിമുഖ്യത്തില് പ്രീ മാരിറ്റല്, പോസ്റ്റ് മാരിറ്റല് കൗണ്സിലിംഗ് നല്കി വരുന്നുണ്ടെന്നും സതീദേവി പറഞ്ഞു. കുടുംബപ്രശ്നങ്ങളുമായി ബന്ധപ്പെട്ട പരാതികളാണ് ആലപ്പുഴയിലെ ജില്ല അദാലത്തില് ഏറെയും വന്നത്. കുടുംബ പ്രശ്നങ്ങളില് കൗണ്സിലിംഗ് നല്കാന് തദ്ദേശസ്വയംഭരണ സ്ഥാപനങ്ങളുടെ ഭാഗമായി സ്ഥിരം സംവിധാനം ആവശ്യമാണെന്നും സതീദേവി പറഞ്ഞു.
അതേസമയം ദമ്പതിമാര്ക്കിടയിലെ പ്രശ്നങ്ങളില് ബന്ധുക്കളിടപെടുമ്പോള് അവ കൂടുതല് സങ്കീര്ണമാകുന്നുവെന്നും സതീദേവി പറഞ്ഞു. കുടുംബപ്രശ്നങ്ങള് സ്ത്രീകളെ വിഷാദരോഗത്തിലെത്തിക്കുന്നുവെന്ന പരാതികളും കിട്ടുന്നുണ്ട്. ശാരീരികാരോഗ്യത്തിനൊപ്പം മാനസികാരോഗ്യകാര്യങ്ങളിലും സ്ത്രീകള് കൂടുതല് ശ്രദ്ധ പുലര്ത്തണമെന്ന് കമ്മിഷന് നിര്ദേശിച്ചു.