ഹേമ കമ്മറ്റി റിപ്പോര്ട്ടിനെ തുടര്ന്ന് സംസ്ഥാനത്ത് 50 കേസുകള് രജിസ്റ്റര് ചെയ്തെന്ന് സര്ക്കാര് ഹൈക്കോടതിയെ അറിയിച്ചു. ഇതില് നാല് കേസുകളില് അന്വേഷണം പൂര്ത്തിയാക്കിയതായും സര്ക്കാര് ഹൈക്കോടതിയില് വ്യക്തമാക്കി. ഇന്ന് ഹേമ കമ്മറ്റി റിപ്പോര്ട്ടുമായി ബന്ധപ്പെട്ട ഹര്ജികള് ഹൈക്കോടതി പരിഗണിക്കുമ്പോഴായിരുന്നു സര്ക്കാര് ഇക്കാര്യങ്ങള് കോടതിയെ അറിയിച്ചത്.
അന്വേഷണം പൂര്ത്തിയായ കേസുകളില് റിപ്പോര്ട്ട് സമര്പ്പിച്ചതായും സര്ക്കാര് ഹൈക്കോടതിയെ ധരിപ്പിച്ചു. ഹൈക്കോടതി നിര്ദ്ദേശപ്രകാരം സര്ക്കാര് നിയമിക്കുന്ന നോഡല് ഓഫീസര്മാര് സിനിമാ മേഖലയിലെ ചൂഷണങ്ങള്ക്കെതിരായ പരാതികളും സ്വീകരിക്കണമെന്ന് ഡിവിഷന് ബെഞ്ച് നിര്ദ്ദേശിച്ചു.
അന്വേഷണ സംഘത്തിനു മൊഴി നല്കിയതിന്റെ പേരില് ആരെങ്കിലും ഭീഷണിപ്പെടുത്തുകയോ സ്വകാര്യമായ വിവരങ്ങള് ചോര്ന്നതായി സംശയിക്കുകയോ ചെയ്താല് പരാതി നല്കാന് നോഡല് ഓഫീസര്മാരെ നിയമിക്കണമെന്ന് ഹൈക്കോടതി സര്ക്കാരിനോട് നിര്ദ്ദേശിച്ചിരുന്നു. നോഡല് ഓഫീസര്മാരുടെ അധികാര പരിധി വര്ധിപ്പിച്ച കോടതി സിനിമാ മേഖലയിലെ ചൂഷണങ്ങള്ക്കെതിരായ പരാതിയും നോഡല് ഓഫീസര്മാര് സ്വീകരിക്കണമെന്ന് നിര്ദ്ദേശിച്ചു.