വിമാനത്തില് പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരെ മര്ദ്ദിച്ച സംഭവത്തില് എല്ഡിഎഫ് കണ്വീനര് ഇ പി ജയരാജന് എതിരെ കേസെടുക്കണമെന്ന കോടതിയുടെ ഉത്തരവിന് പിന്നാലെ പരിഹസിച്ച് കെ എസ് ശബരിനാഥന്. ഇനി കോടതിയേയും ബഹിഷ്ക്കരിക്കുമോ എന്നായിരുന്നു അദ്ദേഹത്തിന്റെ ചോദ്യം. ഫെയ്സ്ബുക്കിലൂടെയാണ് പരിഹാസം.
ഇ.പി.ജയരാജന് തക്കതായ ശിക്ഷ ലഭിക്കാന് നിയമപോരാട്ടം തുടരുമെന്നും അദ്ദേഹം മാധ്യമങ്ങളോട് വ്യക്തമാക്കിയിരുന്നു. ജയരാജന് എതിരെ വധശ്രമത്തിനും ക്രിമനല് ഗൂഡാലോചനക്കും കേസെടുക്കണമെന്നാണ് കോടതി ഉത്തരവ്. വലിയതുറ പൊലീസിനാണ് നിര്ദ്ദേശം നല്കിയിരിക്കുന്നത്. തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതിയാണ് ഉത്തരവ് പുറപ്പെടുവിച്ചത്. മുഖ്യമന്ത്രിയുടെ രണ്ട് പേഴ്സണല് സ്റ്റാഫ് അംഗങ്ങള്ക്കെതിരെയും കേസെടുക്കാന് നിര്ദ്ദേശം നല്കിയിട്ടുണ്ട്.
ഇ പി ജയരാജന് എതിരെ കേസെടുക്കണമെന്ന് ആവശ്യപ്പെട്ട് കേസില് പ്രതികളായ യൂത്ത് കോണ്ഗ്രസ് പ്രവര്ത്തകര് നല്കിയ ഹര്ജിയിലാണ് കോടതിയുടെ ഉത്തരവ്. പ്രതികളായ ഫര്സീന് മജീദ് ആര് കെ നവീന്കുമാര് എന്നിവരാണ് ഹര്ജി നല്കിയത്.