തിരുവനന്തപുരം വെഞ്ഞാറമൂടിന് സമീപം പണയത്ത് നിന്ന് മൂന്ന് ആണ്‍കുട്ടികളെ കാണാതായെന്ന് പരാതി. ഇന്നലെ രാവിലെയാണ് ഇവരെ കാണാതായത്.
11,13,14 വയസ്സ് വീതം പ്രായമുള്ള ശ്രീദേവ്, അരുണ്‍, അമ്പാടി എന്നിവരെ കാണാനില്ലെന്ന് മാതാപിതാക്കള്‍ പൊലീസിന് പരാതി നല്‍കി. അരുണും ശ്രീദേവും ബന്ധുക്കളാണ്. അമ്പാടി ഇവരുടെ സമീപവാസിയാണ്. അടുത്തടുത്ത വീടുകളിലാണ് ഇവര്‍ താമസിച്ചിരുന്നത്. വീട്ടില്‍ നിന്ന് വസ്ത്രങ്ങളും പണവും എടുത്താണ് കുട്ടികള്‍ പോയതെന്നാണ് ബന്ധുക്കള്‍ പറയുന്നത്.
പരാതിയില്‍ വെഞ്ഞാറമൂട് പൊലീസ് അന്വേഷണം ആരംഭിച്ചു. പാലോട് വനപ്രദേശത്ത് കുട്ടികളിലൊരാളെ കണ്ടു എന്ന വിവരത്തിന്റെ അടിസ്ഥാനത്തില്‍ തിരച്ചില്‍ തുടരുകയാണ്. അതേ സമയം കുട്ടികളിലൊരാള്‍ മുമ്പും വീടുവിട്ടിറങ്ങിയിട്ട് ഉണ്ടെന്ന് പൊലീസ് പറയുന്നു. സമീപ പ്രദേശങ്ങളിലെ സിസിടിവികള്‍ പൊലീസ് പരിശോധിക്കുകയാണ്. ബസ് സ്റ്റാന്‍ഡ്, റെയില്‍വേ സ്റ്റേഷന്‍ എന്നിവിടങ്ങള്‍ കേന്ദ്രീകരിച്ചും അന്വേഷണം നടന്നു വരികയാണ്.