തനിക്കെതിരായ കേസില്‍ സുപ്രധാന രേഖകള്‍ പോലീസ്‌ ഇതുവരെ നല്‍കിയിട്ടില്ലെന്നു നടന്‍ ദിലീപ്. ഈ ആവശ്യം ഉന്നയിച്ച്‌ ഇന്ന്‌ അങ്കമാലി മജിസ്‌ട്രേറ്റ്‌ കോടതിയില്‍ രണ്ടു ഹര്‍ജികള്‍ സമര്‍പ്പിക്കും.യുവനടി ആക്രമിക്കപ്പെട്ട കേസിലെ പ്രധാന തെളിവായ ദൃശ്യമടങ്ങിയ വീഡിയോ പകര്‍പ്പും നൂറില്‍പ്പരം തെളിവുരേഖകളുടെ പകര്‍പ്പുമാണു പോലീസ്‌ കൈമാറേണ്ടത്‌.
ദൃശ്യമടങ്ങിയ മൊബൈല്‍ ചിപ്പ്‌ ഉണ്ടെന്ന പോലീസിന്റെ വാദം തെറ്റാണെന്ന നിഗമനത്തിലാണു ദിലീപ്. ഹര്‍ജികള്‍ നല്‍കുന്നതോടെ ഈ രേഖകളെല്ലാം ദിലീപിനു കൈമാറേണ്ടിവരും. ഇതിനു കൂടുതല്‍ സമയമെടുക്കും. അതോടെ വിചാരണ നീട്ടിവയ്‌ക്കാനുമാകും. രേഖകളെല്ലാം പഠിച്ചശേഷം ആത്മവിശ്വാസത്തോടെ വിചാരണ നേരിടാനാണു ദിലീപിന്റെ നീക്കം.
നടി ആക്രമിക്കപ്പെട്ട സംഭവത്തിലെ ഗൂഢാലോചനാക്കേസ്‌ ഇന്ന്‌ അങ്കമാലി മജിസ്‌ട്രേറ്റ്‌ കോടതി പരിഗണിക്കുന്നുണ്ട്‌. കുറ്റപത്രത്തില്‍ പറയുന്ന രേഖകളെല്ലാം കിട്ടി ബോധ്യപ്പെട്ടുവെന്നു പ്രതികളെല്ലാവരും അറിയിച്ചാലേ കേസ് എറണാകുളം പ്രിന്‍സിപ്പല്‍ സെഷന്‍ കോടതിയിലേക്കു കമിറ്റ്‌ ചെയ്ാനാവയൂ. ദിലീപ് ഹര്‍ജി നല്‍കുന്നതോടെ ഈ കേസ് പ്രിന്‍സിപ്പല്‍ സെഷന്‍സ്‌ കോടതിക്കു ഇന്നു കൈമാറാനിടയില്ല. റിമാന്‍ഡിലുള്ള പ്രതികളില്‍ ചിലര്‍ക്കു ജാമ്യം കിട്ടാനുണ്ട്‌. ഇവരെ വിചാരണത്തടവുകാരായി നിലനിര്‍ത്താനാണ്‌ പോലീസിന്റെ നീക്കം.