ലഖ്നൗ: ഉത്തര്‍പ്രദേശില്‍ ഏറെ പ്രചാരണത്തിലുള്ള ടെലിവിഷന്‍ സീരിയല്‍ അനുകരിക്കാന്‍ ശ്രമിച്ച കൗമാരക്കാരന്‍ കഴുത്തില്‍ കുരുക്ക് മുറുകി മരിച്ചു. പൗരാണിക സാങ്കല്‍പ്പിക കഥ പറയുന്ന സീരിയലിലെ “മഹാ കാളി”യുടെ വേഷം അനുകരിക്കാന്‍ ശ്രമിച്ച ഒന്‍പതാം ക്ലാസ് വിദ്യാര്‍ത്ഥി ചിത്തരഞ്ജന്‍ എന്ന രജ്ഞന്‍ ആണ് അബദ്ധത്തില്‍ തൂങ്ങിയരിച്ചത്. ഒന്‍പത് വയസ്സുള്ള സഹോദരിക്കും മറ്റു കുട്ടികള്‍ക്കു മുന്നിലായിരുന്നു ഈ ദാരുണ സംഭവം.
ചൊവ്വാഴ്ച രാത്രി കൃഷ്ണ നഗറിലെ പ്രേം നഗര്‍ കോളനിയില്‍ ആണ് സംഭവം നടന്നത്. സഹോദരി ഗഞ്ചനും മറ്റു കുട്ടികളും ആവശ്യപ്പെട്ട പ്രകാരം നാവ് പുറത്തേക്ക് നീട്ടി നില്‍ക്കുന്ന മഹാകാളിയെ അവതരിപ്പിക്കുകയായിരുന്നു രഞ്ജന്‍. ഇതിനായി കഴൂത്തില്‍ കുരുക്കിട്ട് സമീപത്തുള്ള കതകില്‍ ബന്ധിപ്പിച്ചു. ഇതിനിടെ കുരുക്ക് മുറുകയും ശ്വാസംമുട്ടി മരിക്കുകയുമായിരുന്നു.
മറ്റു കുട്ടികള്‍ ബഹളം വച്ചത് കേട്ട് മാതാപിതാക്കള്‍ എന്തുമ്പോള്‍ രഞ്ജന്‍ അനക്കമില്ലാതെ കിടക്കുന്നതാണ് കണ്ടത്. ഉടന്‍തന്നെ അടുത്തുള്ള ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. പോസ്റ്റ്മോര്‍ട്ടത്തിനു ശേഷം മൃതദേം ബന്ധുക്കള്‍ക്ക് വിട്ടുനല്‍കിയതായി എ.എസ്.പി സര്‍വേഷ് മിശ്ര പറഞ്ഞു. പ്ലംബര്‍ ആണ് രഞ്ജന്റെ പിതാവ്. അമ്മ വീട്ടുജോലിക്കാരിയും.