അമൃതാനന്ദമയിയുടെ ജന്മദിനത്തില് അനുഗ്രഹം തേടിയെത്തിയ മോഹന്ലാലിന്റെ വീഡിയോ കഴിഞ്ഞ ദിവസം സോഷ്യല് മീഡിയയില് വൈറലായിരുന്നു. ആത്മീയതയ്ക്ക് പ്രാധാന്യം നല്കുന്ന മോഹന്ലാല് അമൃതാനന്ദമയിയുടെ ഭക്തനാണ്. കേരളത്തില് അമൃതാനന്ദമയിയ്ക്ക് എതിരായ വിവാദങ്ങള് കത്തി നിന്നപ്പോഴും അവരെ പിന്തുണച്ച് രംഗത്തെത്തിയ താരമായിരുന്നു മോഹന്ലാല്.
അമൃതാനന്ദമയിയുമായുള്ള ബന്ധത്തെ കുറിച്ച് ഒരിക്കല് മോഹന്ലാല് സംസാരിച്ചിട്ടുണ്ട്. കൈരളി ടിവിയുടെ ജെബി ജങ്ഷനില് അമൃതാനന്ദമയി സംസാരിച്ചിരുന്നു. ഇതിന് പിന്നാലെ മോഹന്ലാലും സംസാരിച്ചിരുന്നു. ”എനിക്ക് ഏതാണ്ട് 40 വര്ഷത്തോളമായി അമ്മയെ അറിയാം. സ്കൂളില് പഠിക്കുന്ന കാലം മുതല് അമ്മാവന്റെ കൂടെ അമ്മയെ കാണാന് പോയിട്ടുണ്ട്.”
”എനിക്കൊരുപാട് അനുഭവങ്ങള് ഉണ്ടായിട്ടുണ്ട്. വിശ്വാസം രക്ഷിക്കട്ടെ എന്ന് പറയുന്ന പോലെ നമ്മുടെ അനുഭവങ്ങള് നമ്മുടെ മാത്രം പേഴ്സണലാണല്ലോ. പിന്നെ എന്നോട് പലരും ചോദിക്കുന്ന ചോദ്യങ്ങള് എല്ലാം ഞാന് അമ്മയോട് ചോദിച്ചു. എനിക്ക് മറുപടി കിട്ടണ്ടേ പലതും അമ്മയില് നിന്നും എനിക്ക് കിട്ടി.”
”അമ്മ റിഫൈന്ഡ് ആയിട്ടുള്ള ഒരു സോള് ആണ്. എന്റെ അമ്മയ്ക്ക് സുഖമില്ലാതെ ആയാല് ഞാന് ആദ്യം വിളിക്കുന്നത് ഈ അമ്മയെയാണ്. അമ്മയുടെ ഹോസ്പിറ്റലിലേക്കാണ് പോകുന്നത്. ആ ഹോസ്പിറ്റല് ഉള്ളതുകൊണ്ട് മാത്രമാണ് എനിക്ക് എന്റെ അമ്മയെ ഇപ്പോഴും ഇവിടെയിരുന്ന് ഫോണ് ചെയ്യാന് സാധിക്കുന്നതെന്ന് ഞാന് വിശ്വസിക്കുന്നു.”
”എനിക്ക് വളരെ വിചിത്രമായ സംശയങ്ങള് ഉള്ളപ്പോള് ഞാന് നേരെ വണ്ടിയെടുത്ത് അമ്മയുടെ അടുത്തേക്ക് പോകും. കഥ പറയുമ്പോലെ അമ്മ എനിക്ക് അത് പറഞ്ഞ് തരും. ഓരോ സിനിമ തുടങ്ങും മുമ്പ് പ്ലീസ് ഹെല്പ് മീ എന്ന് ഞാന് മാറി നിന്ന് പ്രാര്ത്ഥിക്കും. ഏതോ ഒരു ശക്തി എന്നെ ഹെല്പ്പ് ചെയ്യും” എന്നായിരുന്നു മോഹന്ലാല് പറഞ്ഞത്.