രാഷ്ട്രീയ പ്രവേശനത്തിന് പിന്നാലെ സിനിമയില്‍ നിന്നും മാറി നില്‍ക്കാനുള്ള വിജയ്യുടെ തീരുമാനം സിനിമാലോകത്തിന് വലിയ നഷ്ടമാണ്. സജീവ രാഷ്ട്രീയത്തിലേക്ക് ഇറങ്ങിയാല്‍ അഭിനയം നിര്‍ത്തുമെന്ന് താരം പ്രഖ്യാപിച്ചിരുന്നു. ദളപതി 69 ആയിരിക്കും തന്റെ ഒടുവിലത്തെ ചിത്രമെന്നും താരം പ്രഖ്യാപിച്ചിരുന്നു. ഈ ചിത്രം വെട്രിമാരന്റെ സംവിധാനത്തില്‍ എത്തും എന്ന റിപ്പോര്‍ട്ടുകളും എത്തിയിരുന്നു.
എന്നാല്‍ ഈ കാര്യത്തില്‍ തുടരുന്ന അവ്യക്തത ആരാധകരെ നിരാശരാക്കിയിരിക്കുകയാണ്. അങ്ങനൊരു സിനിമ താന്‍ ചെയ്യുന്നുണ്ടോ എന്ന് തനിക്ക് അറിയില്ല എന്ന് വെട്രിമാരന്‍ പറഞ്ഞതാണ് ചര്‍ച്ചയായത്. അടുത്തിടെ നടന്ന ഒരു അവാര്‍ഡ് വേദിയില്‍ ആയിരുന്നു ദളപതി 69 ചെയ്യുന്നുണ്ടോയെന്ന ചോദ്യത്തോട് വെട്രിമാരന്‍ പ്രതികരിച്ചത്.
”ഞാന്‍ അത് ചെയ്യുന്നുണ്ടോ ഇല്ലയോ എന്നറിയില്ല. വാര്‍ത്ത പുറത്തുവിട്ട ആളോട് ചോദിക്കണം. കഥ വിജയ്‌യോട് പണ്ട് ഒരിക്കല്‍ പറഞ്ഞിട്ടുണ്ട്. എന്നാല്‍ ഇനി അത് സംഭവിക്കുമെന്ന് കരുതുന്നില്ല” എന്നാണ് വെട്രിമാരന്‍ പറഞ്ഞത്. ഇതോടെ വിജയ് ആരാധകരും സിനിമാപ്രേമികളും നിരാശയാരിക്കുകയാണ്.
അതേസമയം, തിയേറ്ററുകളില്‍ ‘ഗില്ലി’ ചിത്രത്തിന്റെ റീ റിലീസ് ആഘോഷമാക്കുകയാണ് ആരാധകര്‍. തമിഴ്‌നാട്ടില്‍ മാത്രമല്ല കേരളത്തിലും ചിത്രം ആവേശത്തോടെയാണ് ഏറ്റെടുത്തിരിക്കുന്നത്. 20 കോടിയിലേറെ കളക്ഷന്‍ ഇതുവരെ ചിത്രം നേടിക്കഴിഞ്ഞു. ഏപ്രില്‍ 20ന് ആണ് ചിത്രം വീണ്ടും തിയേറ്ററുകളിലെത്തിയത്.
ഗില്ലി വീണ്ടും പ്രേക്ഷകര്‍ ഏറ്റെടുത്തതോടെ ഗില്ലി 2വിന് സാധ്യതയുണ്ടെന്ന് സംവിധായകന്‍ ധരണി പറയുന്നുണ്ട്. ഗില്ലി റീ റിലീസ് എന്ന് കേട്ടപ്പോള്‍ അത് ഒരു ദിവസത്തെ ആഘോഷം എന്നാണ് കരുതിയതെന്നും. ഇത്രയും വലിയ വിജയം ആകുമെന്ന് കരുതിയില്ല എന്നും ധരണി വ്യക്തമാക്കി.